दूरवीन समाचारदाता
स्यानफ्रान्सिस्को । क्यालिफोर्निया
जनवरी १६
गत शनिवार बेलुकीको ८ बज्दा बे एरियाको मौसम चिसो मात्र थिएन, मुसलधारे वर्षा पनि त्यतिकै थियो । तरपनि युवा नेपाली जमातमा चिसो र त्यो मुसलधारे बर्षाको परवाह देखिएको थिएन । बढ्दो बर्षातसंगै भ्यानेस एभेन्यूमा रहेको रिगेन्सी बल रुममा सयौं नेपाली युवा जमातको लाइन बसिसकेको थियो ।
नेपाली युवावर्गमा निकै चर्चित रहेका गायक सज्जनराज बैद्यको जनवरी १३ तारेख ‘घुमीफेरी युएस टुर स्यानफ्रान्सिस्को’को ब्यानरमा भेनेस एभेन्यूमा रहेको ‘ रिगेन्सी बल रुम’मा कार्यक्रममा उपस्थित नेपाली युवा जमात देख्दा लाग्थ्यो, ‘यहाँ कुनै हलिउड वा बलिउडका कलाकारले प्रस्तुती दिने कन्सर्ट भइरहेको छ’ । किनकि, यति धेरै नेपाली युवा जमातको भीड यसअघिका कुनै सांगितिक कार्यक्रममा देखिएको थिएन । जव स्टेजमा गायक बैद्य र उनको टोली गाउन तयार भयो, दर्शकदिर्घा र वाल्कोनीमा सयौं दर्शकहरु आफै गाउन थाले । अर्काे रमाइलो त के देखियो भने बे एरिमा भएको कार्यक्रमहरुमध्ये यो सबै भन्दा महंगो थियो तर ‘ओर्थ इट’ भनेको सुनियो । कार्यक्रममा आएका बे एरियाका लिना बस्नेतले भनिन्, ‘बाल्कोनीवाट हेर्दा सयौं नाचेका र झुमेका मात्र देखिन्थ्यो’ ।
न्यान्सका अध्यक्ष प्रितेश कार्कीले सज्जनराज बैद्यको कन्सर्टले ‘म्यूजिक ह्याज नो एज’ भन्ने लोकप्रिय भनाईलाई प्रमाणित गरेको बताए । बैद्यको म्यूजिकले एक सर्कललाई मात्र नभई सबै तहका संगीतप्रमीहरुलाई उत्तिकै मोहित पारेको प्रतिकृया दिदै उनले भने, ‘यो लेभलको कार्यक्रम सम्पन्न गरेकोमा मानापाथी टीमलाई धन्यवाद र बधाई नदिइरहन सकिदैन, यो कार्यक्रम अविश्मरणी रहनेछ’-, उनले भने ।
सधै भजनकीर्तिन र नेपाली लोकगीत गाउन अघि सर्ने मुक्तिनाथधामका बरिष्ठ उपाध्यक्ष पशुपति कंडेलले कार्यक्रममा गाएको गीत त त्यत्ति बुझेनन् तर सबै युवाजमातले आफैं गाइरहेको मात्र देखें । ‘मैले यसरी सबैले गाएको कुनै कार्यक्रममा देखेको थिइन, त्यही मात्र देखें,’- उनले भने ।
बे एरियामा युवा जमातलाई टार्गेट गरेर अन्तराष्ट्रिय स्तरको कार्यक्रमहरु आयोजना गर्ने उदेश्यका साथ स्थापित मानापाथी इन्टरटेनमेण्टले आयोजना गरेको सो कन्सर्ट बे एरियामा भएको हाल सम्मको सबैभन्दा ठूलो र उत्कृष्ट भएको आयोजकले दावी गरेका छन् । मानापाथीका सदस्य सागर पौडेलका अनुसार १३ सयको हाराहारीमा नेपाली युवायुवतीहरु कार्यक्रममा उपस्थित भएका थिए ।
‘यो हाम्रो मानापाथी समूह (कोर टीम)को चार महिनादेखिको मेहनत र नेपाली संगीतलाई माया गर्ने सबैको सामुहिक प्रयासको एउटा उपलब्धी हो’-पौडेलले दूरवीनसंगको कुराकानीमा भने । उनका अनुसार गायक सज्जनराज बैद्य र उनको समूहले पनि मानापाथीको ब्यवस्थापन र दर्शकहरुको उत्साहजनक सहभागिताप्रति निकै गौरवको अनुभूति गरेको छ । सज्जनराजको संगीतले बे एरिया मात्र नभई अमेरिका नै जुरुक्क उचालेको उनको भनाई थियो ।
कार्यक्रममा सहभागी हुन सियटलवाट आएका नरेश खड्काले आफू वासिंटनवाट साथीहरुका साथ आएको बताए । यतिको ब्यवस्थित सांगितिक कार्यक्रम अमेरिकामा पहिलो पटक हेरेको उनको प्रतिक्रिया थियो ।
गायक बैद्यको कन्सर्टमा सहभागी हुन मिलपिटसवाट आएकी करुणा सेंढाईले कार्यक्रमवारे प्रतिकृया दिदै भनिन-‘सुपर्ब, नेभर एटेण्डेट दीस लेभल अफ अर्गनाइज्ड एण्ड वेल टाइम्ड कँन्सर्ट विफोर, ओर्थ दी टिकट प्राइस’। उनले कन्सर्टको भेन्यू र कार्यक्रम निकै स्तरीय भएको बताइन् ।
गायक बैद्य र उनको समूहमा रहेका १३ सदस्यीय टोली जनवरी ११ तारेख स्यानफ्रान्सिस्को आएको थियो । ‘घुमीफिरी युएस टुर’ अन्तरगत गायक बैद्यको टोलीले डिसेम्वर २२ मा टेक्ससको ड्यालसमा, डिसेम्वर ३० मा न्यूयोर्क, जनवरी ६ मा मेरिल्याण्डको सिल्भर स्प्रिंग, जनवरीमा १३ मा स्यानफ्रान्सिस्कोमा आफ्नो प्रस्तुती दिएको थियो भने जनवरी २१ मा क्यानडाको टोरन्टोमा आफ्नो सांगीतिक प्रस्तुती दिने कार्यक्रम रहेको छ ।
प्रतिक्रिया लेख्नुहोस्:-