अमेरिकामा दर्ता भएर प्रवासी नेपालीहरूका चासो र सरोकारका विषयलाई समेट्दै सञ्चालनमा आएको दूरबिन नेपाल डट कम पहिलो वर्ष पार गरी दोस्रो वर्षमा प्रवेश गरेको छ । क्रमशः छापा पत्रकारिता, रेडियो र टेलिभिजनको दबदबा पछि सुरु भएको डिजिटल जर्नालिजमको युगमा अनलाइनको पहुँच र प्रभाव विस्तार भइरहेको छ ।
स्वदेश र विदेशमा रहेका नेपालीहरूका विषय वस्तुलाई छिटो पस्कन सम्भव तुल्याएका कारण अनलाइन नै हाम्रो रोजाइमा पर्यो । सन्चारकर्ममा रुचि भएका र नेपालमा व्यावसायिक पत्रकारिता गरेर आएका पत्रकार साथीहरू मिलेर एक वर्ष अघि यसको सुरुवात गरिएको हो ।
प्रवासी नेपाली पत्रकारितामा व्यावसायिक जगमा उभिएर निरन्तरता दिन धेरै खालका चुनौतीको सामना गर्नु पर्छ । पत्रकारिताको आधारभूत मूल्यमान्यताको पालना गर्दै प्रवासमा बचेको समय सदुपयोग गर्ने ध्येयका साथ दूरबिन नेपालको सुरुवात भएको थियो । प्रवासी नेपालीहरूका सामूहिक चासो र सरोकारमा जोडिएर वाचडगको रूपमा सहयात्रीको भूमिकामा रहने हाम्रो लक्ष्य र उद्देश्य रहेको छ ।
समाज र पत्रकारिता एक अर्काका अभिन्न अङ्ग हुन् । प्रवासमा समुदायका राम्रा काममा हाम्रा कलम सहयोगी बन्ने छन् भने नराम्रा कर्महरूको चिरफार गर्ने छौँ । प्रवासी नेपालीसमुदायका साथमा हाम्रो मूल नेपालमा समेत योगदान पुग्न सकोस् भन्ने भावना राखिएको छ ।
एकबर्षको यात्रामा हामीलाई हरतरहले सहयोग पुर्याउनुहुने सबैमा हामी हृदय देखि धन्यवाद दिन चाहन्छौ । आगामी दिनमा समेत हाम्रो व्यावसायिक पत्रकारिता गर्ने अभियानमा यहाँहरू सबैको साथ रहने विश्वास लिएका छौँ ।
तोया दाहाल
अध्यक्ष
दूरबिन नेपाल एल एल सी, अमेरिका
प्रतिक्रिया लेख्नुहोस्:-