स्यानफ्रान्सिस्को, जनवरी १८ । नेपालका पुराना एवं सर्वाधिक लोकप्रिय पपगायक नविन के भट्टराईको गत जनवरी १० मा स्यानफ्रान्सिस्कोमा सम्पन्न कन्सर्ट शो बे एरियामा इभेन्ट आयोजना गर्ने प्रोजेक्ट इन्टरटेनमेण्टको सबै भन्दा ठूलो र सफल भएको आयोजकले बताएका छन् । उक्त शो ‘शोल्डआउट’ भएको थियो भने दर्शकहरुको बढ्दो मागका कारण पूर्ववत् तय गरिएको हलभन्दा मिशनस्ट्रिटस्थित रोकोपुलोमा कार्यक्रम गरिएको थियो । कार्यक्रमको भोलिपल्ट गरिएको ‘मिट एण्ड ग्रीट’ कार्यक्रममा पनि उनका फ्यानहरुको उल्लेख्य सहभागिता थियो ।
कार्यक्रम निर्धारित समयभन्दा निकै ढिलो शुरू भए पनि नविन भट्टराईले गाउन थालेपछि दर्शकहरूले प्रतिक्षाको समय बिर्सिएका थिए । ‘कार्यक्रम धेरै ढिला भयो, तर निकै रमाइलो भयो‘ कार्यक्रम हेर्ने स्याक्रामेण्टोबाट आएकी रश्मि नेउपानेले भनिन-‘नविन भट्टराई मेरो लास्टै फेवरेट पपगायक हुन्’। यसले गायक भट्टराईको चर्चित गीतहरु सुन्न वे एरियाका उनका फ्यानहरु निकै प्रतिक्षारत रहेका थिए भन्ने देखिएको थियो । गायक भट्टराईले आफ्ना निकै चर्चित गीतहरु-‘आँखामा तिमीलाई…, साँझपख एकान्तमा… लगायतका गीतहरु गाउँदा दर्शकहरु निकै मोहित भएका थिए ।
आयोजक प्रोजेक्ट इन्टरटेनमेन्टका संचालक हरि ओझाका अनुसार झण्डै १२ सय सय बराबरको सीट क्षमता भएको हलमा दर्शकहरु भरिभराऊ भएका थिए । कार्यक्रमपछि गायक भट्टराईले सामाजिक संजालमा आफ्नो प्रस्तुति पोस्ट गर्दै लेखेका छन्- ‘स्यानफ्रान्सिस्को…बिउटीफूल पिपुल…! धेरै वर्षपछि गायक नविन भट्टराईको शो अमेरिकाका विभिन्न शहरहरुमा भव्यताका साथ सम्पन्न भइरहेको छ ।
वे एरियामा लामो समयदेखि प्रोजेक्ट इन्टरमेण्टले नेपालका चर्चित कलाकारलाई विभिन्न कार्यक्रम मार्फत प्रस्तुत गर्दै आइरहेको छ । यसअघि गत नोभेम्बर महिना मात्रै अर्का चर्चित गायक दुर्गेश थापाको लाइभ शो कन्सर्ट गरेको थियो भने गायक हेमन्त शर्मा, प्रकाश सपुत, कुन्ति मोक्तान, आर्थर गन जस्ता लोकप्रिय कलाकारहरुको कार्यक्रम गरिसकेको छ । प्रोजेक्ट इन्टरटेन्टमेण्टका संचालक हरि ओझा आगामी दिनमा अझ व्यवस्थित भएर अघि बढ्ने बताउँदै भन्छन्- ‘बे एरियाका सवैको साथ,सहयोग र स्नेहप्रति आभारी छु’ ।
प्रतिक्रिया लेख्नुहोस्:-