एनडब्लुजिएनमा शीला थापाको टीम सर्वसम्मत चयन

स्यानफ्रान्सिस्को/ क्यालिफोर्निया
नेपाली महिला विश्व सञ्जाल (NWGN) क्यालिफोर्निया चेप्टरको १६औं अधिवेशनले शीला थापाको अध्यक्षतामा सर्वसम्मत रुपमा नयाँ कार्यसमिति चयन गरेको छ । गत शनिबार आयोजित एक कार्यक्रमको विच निवर्तमान अध्यक्ष लक्ष्मी खरेलले अध्यक्ष थापालाई कार्यभार सुम्पेकी हुन् । सर्वसम्मत नयाँ कार्यसमितिको वरिष्ठ उपाध्यक्षमा तारा पौडेल चालिसे, महासचिवमा सोवे धिताल,सचिवमा अनुराधा अर्याल र कोषाध्यक्ष्यमा रिस्ता कार्की चयन भएका छन् ।
त्यसैगरी अस्मिता सापकोटा, बन्दना पराजुली, विन्दु सापकोटा, ईरा श्रेष्ठ, क्रान्ति अर्याल भण्डारी, रामदेवी पालिखे श्रेष्ठ, रीता राउत, सपना शर्मा र सोयक्क्षा जिसी बोर्ड अफ डाइरेक्टरमा चयन भएका छन् । निवर्तमान अध्यक्ष लक्ष्मी खरेलले नवगठित कार्यसमितिलाई सफलताको शुभकामना दिदै आफ्नो कार्यकालको सफलतामा सम्पूर्ण एनडब्लुजिएनको टीम र नेपाली समुदायको सहयोगप्रति आभार प्रकट गरिन् । ‘विगत दुई वर्षमा मेरो टीम र नेपाली समुदायको सहयोगको कारण हामीले अमेरिकामा मात्र होइन नेपालका वस्तीहरुमा पनि सहयोगका अभियान संचालन गर्न सफल भयौ’, खरेलले भनिन् । कार्यक्रममा नवनिर्वाचित अध्यक्ष शीला थापाले सबैको साथ र सहयोगले आफ्नो टीमले कार्य गर्ने बताउँदै संस्थाको सर्वोपरी हितमा आफ्नो कमिटीले काम गर्ने प्रतिबद्धता जनाइन् । संस्थाको आय-ब्यय विवरणको प्रस्तुति, पुरानो कार्य समितिलाई बिदाई र नयाँ कार्यसमितिको स्वागत गरिएको कार्यक्रममा संस्थाका पूर्व अध्यक्षहरु, साहित्यकार रीतादेवी प्रधान एआरएनए आइसिसी सदस्य उत्तम कार्की,बिन्दु सापकोटा, गीता डंगोल, न्यान्सका पूर्व अध्यक्ष ईश्वर सिटौला, एनआरएनए पश्चिम क्षेत्रिय संयोजक विष्णु केसी लगायतका बे एरियाका समाजसेवीहरु उपस्थित थिए। प्रज्ञा वाग्लेको संचालनमा भएको कार्यक्रममा संस्थामा सहयोग पुऱ्याउने विभिन्न महिला समाजसेवीलाई सम्मान गरिएको थियो ।