दूरबिन संवाददाता
पोखरा ।
लाखौं रुपैयाँ खर्च र त्यति नै महत्वपूर्ण समय व्यतीत गर्दै नेपाल पुगेका निर्वाचित र मनोनितहरुको प्रत्यक्ष उपस्थितिका गरिएको गैरआवासीय नेपाली संघ (एनआरएनए) अन्तराष्ट्रिय समन्वय परिषदको ७१ औं बैठक समस्याको गाँठो फुकाउन र अधिवेशनका समयमा पारित हुन नसकेका महत्वपूर्ण दस्तावेजमा कुनै ठोस निर्णय नगरी टुङ्गिएको छ ।
चर्को विवाद र आरोप प्रत्यारोप बीच गत अक्टोबरमा काठमाडौँमा सम्पन्न नवौँ विश्व सम्मेलनबाट आएकाहरूको पहिलो प्रत्यक्ष बैठक संस्थाका काम र गतिविधिलाई वैधता दिन साथै आम सदस्यहरूको अपेक्षा अनुरूप सुधारका लागि केही ठोस निर्णय लिने अपेक्षा गरिएको थियो । तर नेतृत्वमा कब्जा जमाउने बाहेकको कुनै कार्ययोजना र संस्थालाई आम सदस्यहरूको चाहना अनुरूप अगाडि बढाउने सोच नेतृत्वले बैठकमा देखाउन सकेन । नेतृत्वको कमजोरी र पूर्वाग्रहका कारण आपसी खिचातानीमै बैठक सकिएको एक सहभागीले बताए ।
नवौँ विश्व सम्मेलनले आर्थिक र साङ्गठनिक प्रतिवेदन पारित नगरेकाले विशेष अधिवेशन बोलाएर ती प्रतिवेदनमाथि छलफल गराउन निवर्तमान उपाध्यक्ष कुल आचार्य, निवर्तमान सचिव जानकी गुरुङ तथा एनआरएन युएसएका पूर्व अध्यक्ष डा केशव पौडेलले माग गरेका थिए । तर ति महत्वपूर्ण विषयमा निर्णय गर्ने जिम्मा बैठकले आइ इ एसलाई दिएको बताइएको छ । रोचक पक्ष के छ भने एउटा जीवन्त संस्थामा विधानले तोकेको र कार्यविधि अनुसार नै गर्नै पर्ने अपुरा कामको विषयमा उठान गर्दै संस्था र कार्यसमितिलाई झकझकाउन निकालिएका विज्ञप्ति प्रति संघका अध्यक्ष कुमार पन्तले आपति जनाउदै अनावश्यक वक्तव्यबाजी गरेको भन्दै आलोचना गरेका थिए ।
काठमाडौँका केही स्थानमा शौचालय बनाउन भनी अध्यक्ष पन्तले अघि सारेको योजनाका लागि जम्मा ४० लाख रुपियाँ प्रतिवद्धता बैठकमा व्यक्त भएको थियो । विना कुनै गृहकार्य पन्तले त्यस्तो घोषणा गरेको भनी त्यसको आलोचना पनि कतिपयले गरेका थिए ।
बिभिन्न देशबाट लाखौं रुपैयाँ खर्च गरेर नेपाल पुगेका आइसीसी सदस्यहरूले पोखरा गरिएको खर्चिलो बैठकलाई पनि काठमांडौंकै अधिवेशन अर्को रुप अर्थात अब्यबस्थित, खोक्रो र नियोजित भएको कतिपयको टिप्पणी छ ।
यसै बीच आफ्नो फेसबुक पोस्टमा संघका महासचिव डा हेमराज शर्माले सन् २०२१ अक्टोबरमा संघको निर्वाचन मात्र हुने तर विश्व सम्मेलन नहुने जनाएका छन् । विश्व सम्मेलन निर्वाचन नभएको वर्ष गरिने र भृकुटी मण्डपमा पाल टाँगेर, पाउरोटी र समोसा ख्वाएर निर्वाचन गर्न सकिने हावादारी टिप्पणी पनि उनले गरेका छन् ।
तस्विर: सामाजिक सन्जाल
प्रतिक्रिया लेख्नुहोस्:-