अमेरिका/
एनआरएनए अमेरिकामा अध्यक्षमा प्रतिस्पर्धा गर्न मङ्गलवार बिहानसम्म ४ जनाले उम्मेदवारी दिने घोषणा गरिसकेका छन् । सूर्य लम्साल, डाक्टर अर्जुन बन्जाडे, विनोद कुमार तिवारी र सञ्जय थापाले आफ्नो फेसबुकको भित्ताबाट उम्मेदवारी सार्वजनिक गरेका हुन् । बलियो दाबेदार मानिएका वरिष्ठ उपाध्यक्ष सुनिल शाह र पूर्व उपाध्यक्ष राम सी पोखरेलले भने उम्मेदवारी सार्वजनिक गरिसकेका छैनन् ।
सूर्य लम्सालले सबैभन्दा पहिला अध्यक्षको उम्मेदवारी सार्वजनिक गर्दै अभियान सुरु गरेका हुन् । एनआरएनए अमेरिकाको कार्यसमिति भित्र रहेकाले निर्वाचनको एक महिना अगाडिसम्म उम्मेदवारी घोषणा र अभियान चलाउन नपाउने आफैले जारी गरेको आचार संहितालाई उल्ट्याउदै डाक्टर अर्जुन बन्जाडे, विनोद कुमार तिवारी र सञ्जय थापाले सोमवार अध्यक्षमा उम्मेदवारी दिने सार्वजनिक गरे ।
अरू पदहरूमा पनि उम्मेदवारी घोषणा गर्ने क्रम देखिएको छ । महासचिवका लागि अहिलेसम्म पशुपति पाण्डेले मात्र उम्मेदवारी सार्वजनिक गरेका छन् । नेपालको कम्युनिस्ट पार्टी निकट रहेको प्रवासी मञ्चले यस पटक आफ्नो समूह नै खडा गर्ने सम्भावना छ । प्रवासी मञ्चबाट विजयराज भट्टराईले महासचिवमा उम्मेदवारी दिने अटकलवाजी चलिरहेको छ । वरिष्ठ उपाध्यक्षमा अमृत सापकोटा, भरत अर्याल र सञ्जीव श्रेष्ठले उम्मेदवारी सार्वजनिक गरेका छन् । सचिवका लागि भानु खरेल, रेवती अधिकारी, अमृत कटेलको नाम सामाजिक सञ्जालमा देखिएको छ । कोषाध्यक्षमा रविन वज्रचार्यले उम्मेदवारी सार्वजनिक गरिसकेका छन् । बन्धु पोखरेल, नृपेन्द्र धिताल, सतेन्द्र साहको कोषाध्यक्षमा उम्मेदवारी पर्ने सम्भावना छ । बोर्ड अफ डाइरेक्टरका लागि यस पटक सबै भन्दा अगाडि सी पी पौडेलले आफ्नो उम्मेदवारी सार्वजनिक गरेका थिए । बोर्ड अफ डाइरेक्टरका लागि उम्मेदवारी सार्वजनिक गर्ने क्रम निक्कै बढेको छ । अहिलेसम्म करिब ३० जनाले आफ्नो नाम सामाजिक सञ्जाल मार्फत सार्वजनिक गरेका छन् ।
प्रतिक्रिया लेख्नुहोस्:-