अमेरिका ।
एनआरएनए अमेरिकामा आगामी निर्वाचनका लागि सदस्यताको अन्तिम टुङ्गो नलाग्दै समीकरणमा फेरबदल देखिन थालेको छ । अध्यक्षका बलिया प्रत्यासी सूर्य लम्लासको समूह र नेपाल कम्युनिस्ट पार्टी निकट प्रवासी मञ्चका पूर्व अध्यक्ष सञ्जय थापाको समूह तालमेल गरेर निर्वाचनमा जाने सम्भावना क्षीण भएको छ । अध्यक्षका प्र्त्यासी लम्सालले दूरबिन नेपालसँग कुरा गर्दै भने “सञ्जय जीसँग मिलेर निर्वाचनमा जाने हल्ला चलाइएको सुनियो । त्यो निराधार हो । उहाँसँग मिलेर जाने कुनै तयारी र सम्भावना छैन ।” पछिल्लो समय लम्साल र थापा समूहको सम्बन्ध निक्कै चिसो भएको छ ।
नेपाली जन सम्पर्क समितिका अध्यक्ष आनन्द विष्टले गत निर्वाचनमा सन्जाय थापालाई जिताऊन विभिन्न राज्यमा एउटै मञ्चमा राखेर सार्वजनिक भाषणमा नै थापालाई मतदान गर्न अपिल गरेका थिए । आफ्नै संस्थाको निर्वाचन गर्न नसकेर थलिएर बसेका विष्टले यस पटक प्रवासी मञ्चका पूर्व अध्यक्ष थापाको पक्षमा त्यति ठुलो सक्रियता देखाउने सम्भावना न्यून छ । जसका कारण नेपाली जन सम्पर्क समितिका पूर्व संयोजक विष्णु सुवेदी र उनको समूहसँग सञ्जय थापा पछिल्ला दिनहरूमा नजिकदै गएका छन् । एनआरएनए अमेरिकाको राजनीतिलाई बढी प्रभावित गर्न खोज्ने सो समूहले पनि सञ्जय थापालाई कुनै पदमा सहयोग गर्ने आश्वासन नदिए प्रवासी मञ्चको समूह यस पटक निर्वाचनको मैदानमा देखा पर्ने सम्भावना छ ।
महासचिव लामाले अध्यक्षमा प्रतिस्पर्धा गर्ने
एनआरएनए अमेरिकाका महासचिव बि आर लामाले अध्यक्षमा उम्मेदवारी दिने बताएका छन् । दूरबिन नेपालसँग कुरा गर्दै लामाले भने “एनआरएनए अमेरिकाका मतदाता सदस्यहरूको नामावली मार्च एक तारिखमा बुझाएपछि मार्च २ तारिख अध्यक्षको उम्मेदवारी सार्वजनिक गर्ने छु ।”
लामाले कुनै राजनीतिक समूह र गुटको आड नलिई मैदानमा जाने बताए । लामाले भने “मैले दुई वर्ष संस्था र आम समुदाएको हितमा काम गरेको छु । त्यही शक्तिको बलमा मतदाता बिचमा जाने छु ।” राजनीतिक समूह र शक्ति केन्द्रहरूको प्रभावमा परेर अगाडि बढ्दा संस्थागत हितमा काम गर्न नसकिने लामाको बुझाइ छ । लामाले भने “म कुनै समूह बनाउँदिन । एक्लै मैदानमा जान्छु । मतदाताले निर्वाचित गरेर बनाइदिने समूहमा म विश्वास गर्छु ।”
लामा भन्दा अगाडि पूर्व बोर्ड डाइरेक्टर सूर्य लम्साल, प्रवक्ता विनोद कुमार तिवारी, बोर्ड अफ डाइरेक्टर डाक्टर अर्जुन वनजाडे र सन्जाय थापाले अध्यक्षमा उम्मेदवारी सार्वजनिक गरिसकेका छन् । औपचारिक घोषणा अगाडि नै चर्चामा रहेका वरिष्ठ उपाध्यक्ष सुनिल साह उम्मेदवारी सार्वजनिक गर्ने साइत कुरेर बसेका छन् ।
महासचिवका लागि अहिलेसम्म पशुपति पाण्डेले मात्र उम्मेदवारी सार्वजनिक गरेका छन् । वरिष्ठ उपाध्यक्षमा जेदु पोखरेल, अमृत सापकोटा, भरत अर्याल र सञ्जीव श्रेष्ठले उम्मेदवारी सार्वजनिक गरेका छन् । सचिवका लागि भानु खरेल, रेवती अधिकारी, अमृत कटेलको नाम सामाजिक सञ्जालमा देखिएको छ । कोषाध्यक्षमा रविन बज्राचार्य र बन्धु पोखरेलले उम्मेदवारी सार्वजनिक गरिसकेका छन् । नृपेन्द्र धिताल, सतेन्द्र साहको कोषाध्यक्षमा उम्मेदवारी पर्ने सम्भावना छ । बोर्ड अफ डाइरेक्टरका लागि यस पटक सबै भन्दा अगाडि सी पी पौडेलले आफ्नो उम्मेदवारी सार्वजनिक गरेका थिए । बोर्ड अफ डाइरेक्टरका लागि उम्मेदवारी सार्वजनिक गर्ने क्रम निक्कै बढेको छ । अहिलेसम्म करिब ३५ जनाले आफ्नो नाम सामाजिक सञ्जाल मार्फत सार्वजनिक गरेका छन् ।
प्रतिक्रिया लेख्नुहोस्:-