अमेरिका ।
बिहीबार राति एनआरएन अमेरिकाको सदस्यता छानबिन समितिले आफ्नो काम पुरा गरेको छ । पैसा तिरेर सदस्यताका लागि आवेदन दिएका ८ हजार ९ सय २३ मध्ये ८ हजार ८ सय ६१ सदस्यलाई समितिले अनुमोनदन गरेको छ । अस्वीकृत भएका ६२ जना सदस्य मध्ये केहीको समय गुज्रिएको परिचय पत्र, फर्म र फोटो नमिलाएका कारण अस्वीकृत गर्नु परेको छानबिन समितिका संयोजक रामकुमार सुबेदीले बताउनु भयो ।
छानबिन भएका सदस्यहरूको विवरण सुपरिबेक्षण समितिले हेरेर अनुमोदन गरेपछि छानबिन समितिले कार्यसमितिमा बुझाउने छ । ५ सय ९१ आजीवन सदस्य सहित कुल सदस्य सङ्ख्या ९ हजार भन्दा बढी हुने देखिन्छ । कार्यसमितिले सदस्यहरूको विवरण निर्वाचन समितिलाई बुझाएपछि निर्वाचनको प्रक्रिया अगाडि बढ्छ ।
“काम, घर–परिवार, दिन–रात नभनी छानबिनको काम सम्पन्न गरेका छौ ।” छानबिन समितिका संयोजक सुवेदीले भने “साधैको शङ्का र सन्देह निवारण होस भन्ने सबैको चाहाना थियो । निष्ठा पूर्वक काम गरेका छौ ।”
समयमा नै काम सम्पन्न गरेकोमा एनआरएनए अमेरिकाका अध्यक्ष डाक्टर केशव पौडेल, वरिष्ठ उपाध्यक्ष सुनिल साह र महासचिव बिआर लामाले छानबिन समितिलाई धन्यवाद दिएका छन् । आम सदस्य, सदस्यता अभियानमा सक्रियता साथ लागेका कार्यसमिति र बाहिर रहेका अभियान्ता, छानबिन समिति, सुपरिवेक्षण समिति र आइटी समितिले गरिरहेको कामको उनीहरूले प्रशंसा गरेका छन् ।
सदस्यता प्रक्रियालाई पारदर्शी, विश्वासिलो र त्रुटि रहित बनाउन यति कडा र स्तरीय मापदण्ड एनआरएनएका अरू कुनै पनि नेशनल कोर्डिनेशन काउन्सिलल (एनसीसी) हरूले अपनाएका छैनन् । सदस्यता सम्बन्धमा कुनै विवाद भएमा यो अरू देशका लागि पनि राम्रो नजिर बन्न सक्छ । अध्यक्ष पौडेलले दूरबिन नेपालसँग कुरा गर्दै भने “सदस्यता आवेदन दिँदा स्टेट र फेडरल आइडी राख्नु , फोन र इमेलबाट दोहोरो भेरिफिकेशन कोडको व्यवस्था गर्नु , सुरक्षा घेरा धेरै बनाएर झण्झटिलो बनाउनु राम्रो होइन भनेर केही गुनासा आए । तर पनि सदस्यता लिन चाहाना गर्नेहरूमा कुनै कमी आएन । यो नयाँ प्रयोग गर्दा केही ब्याबधान यस पटक झेल्नु परे पनि आउँदा वर्षमा निर्धक्क भएर सदस्यता लिन सक्ने वातावरण वनेको छ ।”
अघिल्लो वर्षको तुलनामा सदस्य सङ्ख्या घटेपनि एनआरएन अमेरिका सदस्य सङ्ख्याका हिसाबले सबै भन्दा ठुलो एनसीसी भएको छ ।
प्रतिक्रिया लेख्नुहोस्:-