चितवन, २ चैत / चितवन राष्ट्रिय निकुञ्जस्थित गिद्ध प्रजनन केन्द्रमा रहेका दुर्लभ डंगर गिद्धले ६ वटा बच्चा कोरलेका छन् ।
यस वर्षको सिजनमा १८ अण्डा पारेको डंगर गिद्धले ६ वटा मात्रै बच्चा कोरलिएका हुन् ।
निकुञ्जका सहायक संरक्षण अधिकृत वेदबहादुर खड्काकाअनुसार चारवटा गिद्ध ओथारो बसिरहेको भए पनि थप चल्ला कोरल्ने सम्भावना कम छ । यसवर्ष गिद्धले पारेका तीन वटा अण्डा फुटेको थियो भने दुई वटा भूइँको बालुवामा पारेको थियो । बाँकी अण्डा मात्रै ओथारो बसेका कारण कम चल्ला निस्किएको खड्काले बताउनुभयो ।
गुँड बाहिर पारेको अण्डा ओथारो नबस्ने भएकाले ती अण्डा र गुँडबाट खसेर अण्डा फुटेका कारण क्षति भएको उहाँले बताउनुभयो ।
गतवर्ष गिद्धले १५ वटा अण्डा पारेका थिए । ती अण्डाबाट नौ वटा चल्ला कोरलिएको थियो । नोभेम्बर र डिसेम्बर महिनामा अण्डा पार्ने भए पनि गिद्धले यस वर्ष केही छिटो अण्डा पारेको थियो ।
खड्काका अनुसार केन्द्रमा ५७ वटा गिद्ध रहेका छन् । केन्द्रमा २५ वटा भाले र २४ वटा पोथी गिद्ध रहेको खड्काले जानकारी दिनुभयो । आठ वटा बच्चाको लिंग पहिचान हुनसकेको छैन । गतवर्ष कोरलिएको नौमध्ये एउटा बच्चा मरेको थियो । गिद्धको डिएनए परीक्षणबाट मात्रै भालेपोथी छुट्याउने गरिन्छ ।
चितवन राष्ट्रिय निकुञ्जमा सन् २००७ बाट डंगर गिद्ध संरक्षण थालिएको हो । यहाँ संरक्षण गरी हुर्किएका गिद्धलाई क्रमशः प्रकृतिमा छोड्ने गरिएको छ । गतवर्ष ६ वटा गिद्धलाई नवलपरासीको जटायु रेस्टुराँमा राखेर प्रकृतिमा छाडिएको छ । थप पाँचवटा गिद्ध प्रकृतिमा छोड्नका लागि तयारी गरी राखिएको छ ।
सरकारले सन् २०१६ बाट सन् २०१९ सम्ममा १९ वटा संरक्षण गरी राखिएका गिद्धलाई प्रकृतिमा छाड्ने योजना बनाएको थियो । यद्यपि ढिलागरी सन् २०१६ मा छाड्ने भनिएको छवटा गिद्ध गत वैशाख २ गते जटायु रेस्टुराँमा राखी केही महिना अघि प्रकृतिमा छाडिएको छ ।
अति संकटापन्न अवस्थामा रहेको डंगुर जातको गिद्धको संख्या बढाउन संरक्षण कार्यलाई तीव्रता दिइएको छ । विश्वमानै पहिलोपटक प्रकृतिमा लोप हुनलागेको गिद्ध खोरमा हुर्काएर प्रकृतिमा छाड्न थालिएको हो । रासस
प्रतिक्रिया लेख्नुहोस्:-