काठमांडौं । गैर आवासीय नेपाली सङ्घ अन्तर्राष्ट्रिय समन्वय परिषद्को आगामी मार्च २२ देखि २५ तारिख सम्म काठमांडौमा हुने निर्वाचनका लागि मतदाता नामावली र निर्वाचन तालिका सार्वजनिक गर्ने अन्तिम तयारीमा निर्वाचन समिति जुटेको छ । प्रमुख निर्वाचन आयुक्त विश्व नाथ बरालले दूरबिन नेपालसँगको संक्षिप्त कुराकानीमा भने “गैर आवासीय नेपाली सङ्घ राष्ट्रिय समन्वय परिषदहरुले पठाएका प्रतिनिधिहरूको सूचिमा काम भइरहेको छ । तर काठमांडौमा उपस्थित भएका रजिस्टर्ड प्रतिनिधिले मात्र निर्वाचनमा भाग लिन पाउने छन् । भोलि सम्ममा प्रतिनिधिहरूको नामावली र निर्वाचन तालिका सार्वजनिक गरिने छ ।”
प्रमुख संरक्षक शेष घलेले पुरानो निर्वाचन समिति भङ्ग गरी विश्व बरालको नेतृत्वमा नयाँ निर्वाचन समितिलाई जिम्मेवारी सुम्पिएपछि १० औँ विश्व सम्मेलनका लागि काम अगाडि बढेको हो । बराल अमेरिकाबाट काठमांडौं पुगिसकेका छन् । त्यस्तै निर्वाचन समितिमा रहेका वासुदेव फुलारा अमेरिका, डमर घले बेलायत, पुष्प थापा जर्मनी, विमल सुवेदी कतार, प्रकाश धमला दक्षिण कोरियाबाट नेपाल पुगेर निर्वाचन समितिको कामलाई तीव्रता दिएका छन् । प्रमुख संरक्षक शेल घले, १० औँ महाअधिवेशन आयोजक समिति प्रमुख सोनाम लामा, उपप्रमुख मन केसी लगायतले निर्वाचन समितिलाई आवश्यक सहयोग गरिरहेका छन् ।
अधिवेशन उद्घाटन समारोहमा प्रधानमन्त्री, परराष्ट्र मन्त्री, प्रमुख राजनीतिक दलका नेताहरू र नीति निर्माणको तहमा रहेर काम गरिरहनु भएका थुप्रै ब्यक्तिहरुको उपस्थिति रहने आयोजक समितिले जनाएको छ । अधिवेशनमा भाग लिन विश्वभरबाट प्रतिनिधिहरू काठमांडौं आउने क्रम बढेर गएको छ ।
प्रतिक्रिया लेख्नुहोस्:-