जुटने बेला हो; फुटने हैन

प्रा. डा. दुर्गा दाहाल

       मैले आज उठाउन लागेको विषय र प्रसंग अमेरिकाको सिकागोमा हुन लागेको आसन्न राष्ट्रीय महाधिवेशनको हो । यो अधिवेशन हरेक वर्षको सितम्बर महिनामा हुने गर्छ । यस वर्ष पनि साथीहरूले जमर्को गर्नु भएको छ ।

हुन त, अमेरिकाको जेठो र लोकप्रिय सँस्था ए. एन . ए ( ANA ) हो । यो संस्थाको जन्म १९८३ मा भएको हो डी. सी महानगरीमा । कुनै समयमा यसको धेरै लोकप्रियता थियो तर एउटा कालखण्डमा गएर यो आन्तरिक कलहमा फँस्यो र अन्ततोगत्वा विभाजित भयो ।

सौभाग्यवस, केही साथीहरूको अथक प्रयत्नबाट यो पुन: बौरियो एक भएर । डा. अम्बिका प्र. अधिकारी, राजेन्द्र खतिवडा, खगेन्द्र अधिकारी, डा. तुलसी खरेल ,मेदिनी अधिकारी लगायतका अन्य कतिपय सकृय साथीहरूको सकृयतामा यो संस्था अद्यपरिमित जीवन्त छ र पोहोर मात्रै यसले बाल्टिमोरमा भव्यरूपमा राष्ट्रीय सम्मेलनको आयोजना गर्यो ।

अमेरिकामा अहिले ए. एन. ए ( ANA ), आन्मा ( ANMAA ) र नासा ( NASEA ) तीनवटा ठूला संस्थाहरू छन । ए. एन . ए राष्ट्रीय स्तरको संस्था हो भने अन्य दुईवटा क्षेत्रीय स्तरका हुन । यी बाहेक अन्य धेरै संघ- संस्थाहरू विभिन्न शहर हरूमा विद्यमान छन । NRN छुट्टै हो अन्तराष्ट्रीय स्तरको सामाजिक संस्था तर यसले राजनीति र व्यापार गर्छ ।

अहिलेको युग भनेको मिलेर बस्ने हो । जुट्ने बेला हो; फुटने हैन । कसैलाई कमजोर आँक्ने हैन; सबैको अस्तित्वलाई स्वीकार्ने बेला हो । यही यथार्थतालाई मध्य नज़र राख्तै डा. दिवाकर पौडेलले सबैलाई मिलाएर यो तेश्रो महाधिवेशनको तैयारी गर्न लाग्नु भएको प्रतीत हुन्छ । यो कार्य अनुकरणीय र स्वागतयोग्य पनि छ । तर सम्बन्धित सबैलाई ईमेल अथवा पत्राचार मार्फत जानकारी दिएर, सबैको भावना प्रतिविम्वित हुने गरि समेटेको राम्रो हुन्छ ।

उपरोक्त तीन संस्था बाहेक अन्य धेरै संघ- संस्था र नेतृत्व जन्मि सकेका छन अब अमेरिकामा । सबैलाई समेटेर अब एउटा बनाऊँ । अमेरिकामा एउटा मात्र संस्था बनाएर विभिन्न स्थानमा महासम्मेलन गर्न सक्नु पर्छ । स्थानीय स्तरका संस्थाहरू पनि धेरै मज़बूत छन अब । उहाँ हरूलाई पनि आह्वान गरौँ ।

सारांशमा भन्नु पर्दा, अब सबै मिल्नुको विकल्प छैन । सर्व हिताय; सर्व सुखाय !

( प्रा. डा . दुर्गा दाहाल ANA का वर्तमान संचार निर्देशक पनि हुन )