नेपाल डे परेडको तयारी पुरा

 सान् फ्रान्सिस्को । गैर आवासीय नेपाली सङ्घ अमेरिका वेष्टकोष्ट रिजन र क्यालिफोर्निया च्याप्टरले क्यालिफोर्नियाका विभिन्न सङ्घ संस्थाहरुसंगको सहकार्यमा नेपाली नयाँ वर्षको उपलक्ष्यमा सान् फ्रान्सिस्कोमा गर्न लागेको नेपाल डे परेडको तयारी पुरा भएको जानकारी आयोजकहरूले दिएका छन् ।  परेड यही अप्रिल ९ तारीख शनिबारका दिन बिहान ११ बजे सान् फ्रान्सिस्कोको फेरी बिल्डिंगबाट सुरु भएर सिभिक सेन्टरको यु एन प्लाजामा पुगेर कोण सभामा परिणत हुनेछ।

कार्यक्रममा अमेरिकाका विभिन्न राज्यहरूबाट र क्यालिफोर्नियाका विभिन्न सहरहरूबाट ठुलो सङ्ख्यामा सहभागीहरू उपस्थित हुने मूल आयोजक समितिका संयोजक एवं गैर आवासीय  नेपाली सङ्घ अमेरिकाका पश्चिम क्षेत्रीय संयोजक श्रीराम थापाले जानकारी दिए। बाहिरबाट आउनुहुने पाहुनाहरूका लागी सान् फ्रान्सिस्को फाईनान्सियल डिस्ट्रिक्टमा रहेको होटेल हिलटनमा सुलभ मूल्यमा कोठाहरू बुकिङ गरिएको र विमानस्थलबाट पिक अप र ड्रप अफको समेत व्यवस्था गरिएको कार्यक्रमका हस्पिटालिटि एण्ड म्यानेजमेन्ट संयोजक रवि सिंह बस्नेतले बताए।

एनआरएनए ले विभिन्न स्थानीय संघसंस्थाहरुसंग सहकार्य गरेर आयोजन गरेको कार्यक्रममा प्राय सबै संघसंस्थाहरुको प्रत्यक्ष संलग्नता रहने छ। विभिन्न संस्थाहरूले आफ्नो समुदाय अनुसार विभिन्न जातजाति, भाषा, धर्म र संस्कृति झल्काउने झाँकी र भेषभुषा सहित परेडमा सहभागी हुने परेडको सङ्घ संस्था संयोजन समितिका संयोजक उत्तम किर्किले जानकारी दिए।

सोही साँझ सान् फ्रान्सिस्कोकै युनाइटेड आइरिस कल्चर सेन्टरको हलमा सांस्कृतिक कार्यक्रम पनि आयोजना गरिएको छ। उक्त कार्यक्रममा भोइस अफ नेपाल सिजन थ्रीकाका विजेता किरण गजमेर, दोहोरी गायक मिलन लामा, गायिका सङ्गीता थापा मगर, गायक उदय भट्टराई लगायत अन्य स्थानीय कलाकारहरूको प्रस्तुति रहने सांस्कृतिक कार्यक्रमका संयोजक निर्मल फुयाँलले बताए। प्रवेश शुल्क ४३० कायम गरिएको साँझको सांस्कृतिक कार्यक्रममा डिनरको पनि व्यवस्था गरिएको छ। टिकट www.thingsnepali.com बाट अनलाइन काट्न सकिने जानकारी कार्यक्रमका आई टी एवं डिजाईनिंग संयोजक अभिषेक ज्ञवालीले दिए।

कार्यक्रममा ५०  जना भन्दा बढी स्वयंसेवकहरूको व्यवस्था आयोजकले गरेको छ। स्वयंसेवकहरूले दुवै कार्यक्रमलाई भव्य र सभ्य बनाउन महत्त्वपूर्ण भूमिका निर्वाह गर्ने स्वयंसेवक परिचालन समितिका संयोजक एवं एनआरएनए क्यालिफोर्निया च्याप्टरका उपाध्यक्ष प्रेमराज केसीले जानकारी दिएका छन्।

बिहानको परेड र साँझको सांस्कृतिक कार्यक्रमको कुल खर्च ४३५००० अनुमान गरिएको छ। खर्च व्यवस्थापन र सहयोग सङ्कलनको लागि बनेको राजेश थापा, नारायण खनाल र प्रितेश कार्कीको आर्थिक समितीले आवश्यक बजेटको ९० प्रतिशत भन्दा बढी सङ्कलन गरिसकेको बताएको छ।