बद्रि गौतम- दूरबिन नेपाल
न्युयोर्क अप्रिल ७ । गैर आवासीय नेपाली सङ्घ (एनआरएनए) राष्ट्रिय समन्वयन परिषद् अमेरिकाको आसन्न निर्वाचनमा अध्यक्षका लागि सूर्य लम्सालले आफ्नो उम्मेदवारी प्रस्तुत गरेका छन् । सामाजिक सञ्जाल मार्फत पहिले नै आफ्नो उम्मेदवारी घोषणा गरिसकेका लम्सालले आइतबार न्युयोर्कमा आयोजित एक कार्यक्रममा औपचारिक रूपमा अध्यक्षमा दावेदारी प्रस्तुत गरेका हुन् ।
सक्षम एनआरएनए र समृद्ध नेपालको नारा दिँदै चुनावी मैदानमा उत्रिएका लम्सालले एनआरएनए अमेरिकाको उत्थान र विकासको आफ्नो अवधारणा पेस गर्दै, अहिले एनआरएनए अमेरिकाले सबैलाइै समेट्न नसकेको राजनीतिक खिचातानीको सिकार भएको तथा पदलोलुप प्रवृत्तिका कारण कमजोर भएका आरोप पनि लगाए । लम्सालले एनआरएनए अमेरिकाको सुधारको लागि आफ्नो खाका र गर्ने कार्य विवरण पेस सार्वजनिक गर्दै आफुनै सक्षम रहेको प्रष्टिकरण पनि दिए ।
उम्मेदवारी घोषणा कार्यक्रममा सहभागीहरूको जिज्ञासाको उत्तर दिँदै अध्यक्षका प्रत्यासी लम्सालले आफूले नेतृत्व गर्ने एनआरएनए बलियो र सबै नपालीको साझा संस्था बन्ने, र नेपाल सरकारबाट पाउन सकिने सेवा सुविधा पनि दिलाउने प्रतिबद्धता व्यक्त गरे । पेशाले इन्जिनियर रहेका लम्सालको उम्मेदवारी घोषणा कार्यक्रममा न्युयोर्कमा रहेका विभिन्न सङ्घसंस्थाका प्रतिनिधिहरूको बाक्लो उपस्थिति रहेको थियो ।
सहभागीहरूले लम्सालले प्रस्तुत गरेको अवधारणाको प्रशंसा गर्दै उनलाई जितको लागि शुभकामना समेत दिएका थिए । एनआरएनए अमेरिकाको सन २०१५ – १७ को कार्यकालका लागि सदस्य पदमा राम्रो मतका साथ विजयी भएका लम्साल अघिल्लो निर्वाचनमा महासचिव पदमा पराजित भएका थिए । सबैभन्दा धेरै मतदाता रहेको न्यु योर्क सहरमा बसोबास गर्दै आएका लम्साललाई आगामी निर्वाचनमा बलियो प्रतिस्पर्धी मानिएको छ ।
प्रतिक्रिया लेख्नुहोस्:-