अमेरिका १९ अप्रिल ।
एनआरएनए अमेरिकाको आसन्न निर्वाचनका लागि वरिष्ठ उपाध्यक्ष सुनिल साहलाई अध्यक्ष र अर्का अध्यक्षका दाबेदार डाक्टर अर्जुन वनजाडेलाई वरिष्ठ उपाध्यक्षमा मिलाएर अगाडि बढाएको साह समूहले बिहीबार अधिकांश पदहरूमा कस कसलाई अगाडि बढाउने भन्ने टुङ्गो लगाएको छ ।
साह समूहलाई बलियो बनाउँदै अगाडि बढाइरहेको समूहको बिहीबार राती ३ घण्टा लामो छलफल भएको समाचार स्रोतको भनाई छ । एनआरएनए अमेरिकाका उत्तर अमेरिका क्षेत्रीय संयोजक गौरी जोशी, एनआरएनए अमेरिका अध्यक्ष डाक्टर केशव पौडेल, विष्णु सुवेदी, डाक्टर यादव पण्डित, हरिबोल भण्डारी लगायत बैठकमा सहभागी रहेका थिए ।
पहिलो चरणमा वरिष्ठ उपाध्यक्षका दाबेदार वी आर लामा, जेदू पोखरेल, भरत अर्याल, अमृत सापकोटा र इन्दिरा त्रिपाठीलाई बैठकमा बोलाएर अरू पदमा उठ्न उनीहरूले आग्रह गरेका थिए । वरिष्ठ उपाध्यक्षका दाबेदारको चर्को आक्रोश र आलोचना खेप्नु परेको थियो मिलाउने पक्षधरहरूलाई । सहमतिलाई पालना गर्ने पक्षमा रहेको सन्देश पठाएकी इन्दिरा त्रिपाठी भने बैठकमा सहभागी थिइनन् । अमृत सापकोटाले आफू अरू पदमा नउठ्ने बताए । जेदू पोखरेलले पछाडि हट्न नसक्ने बताए । बी आर लामालाई पूर्व क्षत्रिय उपाध्यमा उठ्न चर्को दबाब पर्यो । भरत अर्यालले कसैलाई च्याप्ने, उचाल्ने, र कसैलाई पछार्ने खेलकुद गर्ने र अन्तमा मिलौँ भन्नु राम्रो नभएको भन्दै आक्रोश पोखे ।
यो समूहले महासचिवमा पशुपति पाण्डेलाई अगाडि बढाउने लगभग निश्चित छ तर गोपेन्द्र भट्टराईलाई कहाँ मिलाउने भनेर कसरत गरिरहेका छन् । त्यस्तै सचिवमा पनि भानु खरेल र अमृत कट्टेललाई मिलाउन प्रयास गरिरहेको छ । कोषाध्यक्षमा बन्धु पोखरेललाई अगाडि बढाउने भएका छन् । पश्चिम क्षेत्रीय उपाध्यक्षमा सर्वज्ञ वाग्ले, दक्षिणमा कृष्णजिवी पन्त, मध्येमा बुद्धि सुवेदी र महिला कोर्डिनेटरमा दीक्षा बस्नेतको नाममा सहमति भइसकेको समाचार स्रोतको दाबी छ ।
प्रतिक्रिया लेख्नुहोस्:-