दूरबिन संवाददाता
अमेरिका । एनआरएनए अमेरिकाको अगामि मे महिनामा हुन गइरहेको निर्वाचनका लागि दाखिला भएका उम्मेदवारहरूको सूचि अनुसार २० भन्दा बढी राज्यमा निर्विरोध नेतृत्व चयन भएको देखिएको छ । टेक्सस, न्यु योर्क, क्यालिफोर्निया, मेरिल्यान्ड, कोलोरोडो, लगायतका धेरै सदस्य संख्या भएका केही राज्यमा भने नेतृत्व चयनका लागि निर्वाचन हुने भएको छ ।
एनआरएनए अमेरिकाका अध्यक्ष सुनिल साहले दूरबिन नेपालसँग भने “एनआरएनए अमेरिकाका २९ वटा राज्यमा रहेका च्याप्टर मध्ये २० भन्दा बढीमा निर्विरोध नेतृत्व चयन हुनु खुसीको कुरा हो ।” सोमबार रातीसम्म उम्मेदवारको सम्बन्धमा दाबी विरोध आएमा निर्वाचन आयोगले प्रकाशित सूचिमा फेरबदल गर्न सक्ने छ ।
अध्यक्षका दाबेदार सूर्य लम्सालको उम्मेदवारीका सम्बन्धमा भने अमेरिकामा चर्चा भइरहेको छ । एनआरएनए अमेरिकाको संशोधित विधानले संस्था विरुद्ध मुद्दा दाखिला गर्ने व्यक्तिको मुद्दा नटुङ्गिएसम्म अध्यक्षमा उम्मेदवारी दिन नपाउने उल्लेख गरिएको छ । लम्सालले विधान संशोधन अगाडि दाखिला गरेको मुद्दा अझै टुङ्गिएको छैन । जसको कारण उनको उम्मेदवारी के होला भन्ने विषयमा चर्चा भएको हो । विधान संशोधन हुनु अगाडिको मुद्दा भएका कारण लम्सालका सन्दर्भमा विधान आकर्षित नहुने साथै अध्यक्षका लागि योग्य सदस्य कायम नै रहेको अवस्थाले यो विषय पेचिलो बन्न पुगेको छ ।
प्रतिक्रिया लेख्नुहोस्:-