नेपाली कथानक चलचित्र “द सेक्रेट अफ राधा” फ्रिमण्ट र कंकर्डमा प्रदर्शन हुदै

स्यानफ्रान्सिस्को, क्यालिफोर्निया
नेपाली कथानक चलचित्र ‘द सेक्रेट अफ राधा’क्यालिफोर्नियाको स्यानफ्रान्सिस्को बे एरियामा आगामी जुन ३ र ४ शनिवार र आइतवार फ्रिमण्टको सिने लाउन्जमा प्रदर्शन हुने भएको छ भने कंकर्डस्थित थिएटरमा जुन ७ तारेखमा बेलुकी प्रर्दशन हुने ब्यवस्था मिलाइएको छ ।  सामाजिक मुद्दामा बनेको नारी प्रधान चलचित्र ‘राधा’ ले नारी पात्रको प्रतिनिधित्व मात्र नगरी नेपाली समाजको  चित्रण गरेको चलचित्रका निर्देशक सुवर्ण थापा बताउछन् । “वास्तवमा यस चलचित्र नेपाली समाजमा दिनहु भएका र घटेका घटनाहरुको दर्पण हो,” निर्देशक थापाले दूरविनसंग भने ।

आफ्नो चलचित्रले आफ्नो पनि भोगाईको विषयलाई उजागर गरेको उल्लेख गर्दै निर्देशक थापा भन्छन्, ‘यस चलचित्रको निमार्ण र प्रदर्शनपछि नेपाल र अन्य देशका दर्शकहरुवाट निकै सकारात्मक प्रतिकृया पाएको छु ‘। अमेरिका र यूरोपमा बसोवास गर्ने नेपालीहरु र खासगरि दोश्रो पूस्ताका नेपालीहरुलाई नेपाली महिलाहरुको संघर्ष र उनीहरुको भोगाईवारे चलचित्रले थप प्रष्ट पार्न सहयोग गर्ने बताउदै भन्छन्,-“यो मनोरन्जन मात्र नभई समग्र नेपाली नारीहरुको एकमुष्ट कथा हो “।

कलाकारहरु श्रृष्टि श्रेष्ठ, खगेन्द्र लामिछाने, निश्चल बस्नेत, सौगात मल्ल, दयाहाङ राई, मेनुका प्रधान, बुद्धि तामाङलगायतको आभिनय रहेको छ ।
चलचित्र सौगात मल्ल र निर्देशक थापाको संयुक्त लगानीमा बनेको हो र अहिले निर्देशक थापा अन्तराष्ट्रिय डायस्पोरामा राधा चलचित्र प्रदशन गर्ने क्रममा आफै प्रदशनमा जुटेका हुन् । टिकट Nepalithings अनलाइनमा किन्न पाइने र शो समयमा हलमा पनि किन्न सकिने ब्यवस्था मिलाइएको निर्देशक थापाले बताए ।
कोरियाको बुसान फिल्म फेस्टिवलबाट पटकथा लेखनमा ग्राण्ट पाएको यस चलचित्र नेफ्टाको १० वटा विधामा मनोनित भएको थियो भने निफमा जुरी अवार्ड जितेको थियो । हाल फ्रान्समा बसोवास गर्दै आएका निर्देशक थापा अँतारष्ट्रिय बृत्तचित्र र चलचित्र निमार्णमा अब्बल मानिन्छन् । चलचित्रलाई अमेरिका र अस्ट्रेलियाका मुख्य शहरहरुमा प्रदर्शन गरिने बताइएको छ ।