भीमदत्तनगर, १ असार / कञ्चनपुरको बेदकोट नगरपालिकाले आज नगरक्षेत्रका किसानलाई रु २४ लाख बराबरको कृषि उपकरण वितरण गरेको छ ।
परम्परागत रुपमा गरिँदै आएको खेती प्रणालीलाई विस्थापित गरी आधुनिकिकरण र कृषिलाई व्यावसायिकतातर्फ लैजान कृषि उपकरण वितरण गरिएको बेदकोट नगरपालिकाका नगरप्रमुख अशोककुमार चन्दले जानकारी दिनुभयो । उहाँले किसानलाई ट्याक्टरको साँचो हस्तान्तरण गर्नुभयो ।
बेदकोट नगरपालिका–९ सुन्दरपुरका किसानलाई ट्याक्टरलगायत आवश्यक कृषि उपकरण हस्तान्तरण गरिएको छ । स्थानीय इन्दे्रणी सहकारीमा आवद्ध कृषकलाई नगरपालिकाले अनुदानस्वरुप रु २४ लाख बराबरका कृषि औजार हस्तान्तरण गरेको हो ।
प्रधानमन्त्री कृषि आधुनिकिकरण कार्यक्रमलाई विस्तार गर्न तथा किसानलाई कृषि पेशातर्फ आकर्षित गर्न उपकरण वितरण गरिएको चन्दको भनाइ छ ।
कार्यक्रममा इन्द्रेणी सहकारीका ब्लक संयोजक पदम कुँवरले नगरपालिकाले कृषि औजार तथा रु एक लाख ५० हजार बराबरको बीउ दिएको बताउनुभयो । उहाँले नगरपालिकाले ट्याक्टर, रोडाभेटर र १४ वटा पानी मिटर बोर्ड अनुदानमा उपलब्ध गराएको बताउनुभयो । केही दिनभित्रै अन्य कृषि औजार वितरण गर्ने नगरपालिकाले जनाएको छ । रासस
प्रतिक्रिया लेख्नुहोस्:-