जाङ्बु शेर्पा
अमेरिका ।
अमेरिकी राष्ट्रपतिको चुनावको मिति नजिकिँदै गर्दा अमेरिकाबाट दसौँ लाख कागजपत्र विहीनहरूलाई देश निकाला गरिने राष्ट्रपति डोनाल्ड ट्रम्पले चेतावनी दिएका छन् ।
सोमबार साँझ ट्रम्पले ट्विट गर्दै भनेका छन् ‘अमेरिका आउने कागजपत्र विहीनहरूलाई जति छिटो आएका थिए, त्यति नै छिटो देश निकाला गरिने छ’ ट्विटमा ट्रम्पले हालै मात्र अमेरिका आउँदै गरेका २४ जना आप्रवासीलाई पक्राउ गरेकोमा ग्वाटेमालाको प्रशंसा गरेका छन् ।
अमेरिकामा झन्डै १० लाख व्यक्तिले अन्तिम देशनिकालाको आदेश पाएर पनि अमेरिकामा नै बसिरहेका छन् । उनीहरूलाई पक्राउ गरेर देश निकाला गर्ने ट्रम्प प्रशासनको योजना रहेको छ । ट्रम्पले कागजपत्र विहीन आप्रवासीलाई अर्को साता देखि नै देश निकाला गर्ने बताएका छन् ।
यद्यपि यसबारे इमिग्रेसन एण्ड कस्टम इन्फोर्समेन्टले भने कुनै जानकारी नआएको बताएको छ । आइसले अहिलेसम्म सबैभन्दा धेरै सन् २०१२ मा ४ लाख ९ हजार ८ सय २४ जनालाई अमेरिकाबाट देश निकाला गरेको थियो ।
यसै बिच गत साता मात्र इमिग्रेसन एण्ड कस्टम इन्फोर्समेन्टले १ सय ५० जनालाई पक्राउ गरेको छ । पक्राउ पर्नेमा अधिकांश ग्वाटेमाला, मेक्सिको र दक्षिण कोरियाको नागरिक रहेका छन् । आइसिइले पक्राउ परेका सबै आपराधिक गतिविधिमा संलग्न भएको जनाएको छ
प्रतिक्रिया लेख्नुहोस्:-