काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले लोड धान्न नसकेपछि उत्पादन गरिरहेका विद्युत् गृहहरू एकाएक बन्द भएकाले आपूर्तिमा रोकावट आएको प्रष्टीकरण दिएका छन् ।
यसबारेमा जानकारी दिन आइतबार आयोजित पत्रकार सम्मेलनमा उनले आन्तरिक आपूर्ति कटौती गरी भारत निर्यात नगरिएको उल्लेख गर्दै भने, ‘प्रसारण लाइनको कम क्षमता, गर्मीले बिजुलीको माग वृद्धि र ओभर लोड (अधिक चाप) भएपछि सिष्टम ट्रिप भएको हो, निर्यात गरी यहाँ बिजुली काटिएको होइन ।’
‘मध्य र पश्चिम नेपालका धेरैजसो ठाउँमा आपूर्तिमा अवरोध भएको र केही दिनअघि निर्यात पनि सुरु भएकोले लोडसेडिङ गरी निर्यात गरियो भन्ने प्रचार गरियो,’ घिसिङले भने, ‘केही सवस्टेशन र प्रसारण लाइनहरूमा फल्ट (ओभरलोड) भएकाले कम भोल्टेजमा विद्युत गृह चल्दा ट्रिप (बन्द) हुन पुग्यो, यस्तो ट्रिप दिनमा ११ पटकसम्म भयो ।’
तराई क्षेत्रमा गर्मी बढेकाले पंखा, वातानुकूलित (एसी) देखि घरायसी लोड धेरै बढेकाले वितरण लाइनमा समस्या परेको घिसिङले बताए । ओभरलोडले ट्रान्सफरमरहरू पड्किने, तत्काल फेर्न स्थानीयले नदिने लगायतका समस्याले आपूर्तिमा रुकावट भएको उनको भनाइ थियो । ‘यहाँ विद्युत् कटौती गरेर निर्यात गरेको होइन,’ उनले भने, ‘सिष्टम नै गएको बेला कसरी निर्यात हुन्छ ? निर्यात र अपरेशनसँगसँगै पो हुन्छ त ।’
प्रतिक्रिया लेख्नुहोस्:-