लस एन्जलस, १४ जुलाई । श्री पशुपतिनाथ तथा बुद्ध मन्दिर लस एन्जलसमा जुलाई ९ देखी १४ सम्म सञ्चालित घुम्ती कन्सुलरमा ७ सय ८५ जनाले सेवा लिएका छन । हरेक दिन बिहान ९ः०० देखि बेलुका ६:०० सम्म पासपोर्ट नवीकरणको समय तालिका भए पनि कतिपय दिन साँझ ९ बजे सम्म पनि दूतावासका कर्मचारीले सेवा प्रदान गरेका थिए।
स्वयसेवकहरुले कागजी प्रक्रिया मिलाउने, फोटो खिच्न सहयोग गर्ने, फर्म भर्ने, नपुग कागज पत्रहरू प्रिन्ट गर्ने लगायतका सेवा प्रदान गरेका थिए। गत वर्षको घुम्ती शिविरमा हुलाकको लेबल लिन कठिनाइ भएको कारण श्री पशुपतिनाथ फाउन्डेसनले पासपोर्टको लागि आवश्यक पर्ने युएसपीएसको लेबल समेत प्रिन्ट गर्ने व्यवस्था मन्दिर भित्र नै मिलाएको थियो ।
शिविर प्रभावकारीरुपमा संचालन गर्नको लागि नेपाल अमेरिका एकता समाज लगायत स्थानीय संघसंस्थाहरुले सहयोग पुर्याएका थिए । शिविर सुरु हुनु भन्दा अघिल्लो दिन नेपाली जन सम्पर्क समिति, साउदर्न क्यालिफोर्निया च्याप्टरले दूतावासका कर्मचारी र स्वयं सेवकलाई डिनरको आयोजना गरेको थियो भने शिविरको अन्तिम दिन जुलाई १४ मा मधेसी एसोसिएसनले डिनरको व्यवस्था तथा नर्सिङ एसोसिएसनले हरेक दिन प्राथमिक उपचारको व्यवस्था गरेको थियो । शिविर अवधिभरको लागि एनडब्लुजीएनले पानीको व्यवस्था, ८८४८ ईन्टरटेन्मेन्ट एलए ले दिउसोको खाना तथा जय नेपाल इन्टरनेशनल फाउन्डेसन, साउदर्न क्यालिफोर्निया च्याप्टरले हरेक दिन बिहानको खाजा व्यवस्था गरेको थियो ।
सुरुमा १३ तारिख सम्म ५ दिनको घुम्ती शिविर राख्ने योजना भएकोमा अत्यधिक मागको कारण सबैलाई सहज ढंगमा सेवा पुगोस् भनी एक दिन थप गरी ६ दिन बनाउँदा पनि धेरै जना एप्वाइण्टमेन्ट लिन छुट्नु भएको हुँदा ढिला सम्म काम गरेर भए पनि सबैको पासपोर्ट बनाएर सेवा प्रदान गर्न सकेकोमा राजदूतावासका कर्मचारी लगायत सम्पूर्ण स्वयंसेवी संस्था तथा व्यक्तिलाई नेपाल सरकारका क्यालिफोर्नियाको लागि अवैतनिक महावाणिज्यदूत ऋषि ढकालले बधाई दिनु भयो ।
प्रतिक्रिया लेख्नुहोस्:-