जय नेपाल फाउण्डेशनको ‘टोलटोलमा पुस्तकालय अभियान’ को शुरुवात

चितवन, ४ अगस्ट। जय नेपाल इन्टरनेशनल फाउण्डेशनको ‘टोलटोलमा पुस्तकालय अभियान’ को शुरुवात चितवन जिल्ला, भरतपुर महानगरपालिका वडा नं १६, विजयनगरको विजय टोलबाट गरेको छ। सानो नि: शुल्क खुला पुस्तकालय यथासक्य धेरै ठाउॅंमा स्थापना गरेर पठन संस्कृतिलाई मलजल गर्ने उद्देश्यले जय नेपाल इन्टरनेशनल फाउण्डेशनले टोलटोलमा पुस्तकालय अभियानको अवधारणा ल्याएको हो ।

जय नेपाल इन्टरनेशनल फाउण्डेशनको गत आषाढ २८, २०८१, तदनुसार जुलाई १२, २०२४ का दिन बसेको अन्तर्राष्ट्रिय समितिको बैठकद्वारा सुभाष घिमिरेजीलाई “टोलटोलमा पुस्तकालय” अभियानको संयोजकको जिम्मेवारी सुम्पिइएको थियो । आफ्नो इच्छा बमोजीम किताब राख्न र लिन सकिने अवधारणा अनुरूपको यो विश्वव्यापी दीर्घकालीन अभियान अन्तर्गत यस अभियानलाई मातृभूमि नेपालका अतिरिक्त जय नेपाल इन्टरनेशनल फाउण्डेशनका शाखा स्थापित भएका विभिन्न राष्ट्रमा समेत विस्तार गर्ने लक्ष्य राखिएको छ ।

जय नेपाल फाउण्डेशनका शाखाहरूको पहलमा स्थानीय सहयोग लिएर स्थानीय स्तरमा नै स्थापना गर्न सकिने यो पुस्तकालय काठ र सिसा प्रयोग गरी निर्माण गर्न सकिन्छ । करिब रू. बीस हजारको लागतमा निर्माण हुने उक्त पुस्तकालयमा “जय नेपाल इन्टरनेशनल फाउण्डेशनद्वारा निर्मित” भन्ने उल्लेख गरिनेछ । त्यसका साथै उक्त पुस्तकालयमा नेपाल बाहिर भए “Little Free Library Take a Book, Leave a Book ! You can also take a book without leaving one and you can leave a book without taking one ! ” र नेपालभित्र भए “सानो नि: शुल्क पुस्तकालय एउटा किताब लिनुहोस्, एउटा छोड्नुहोस् ! तपाईं कुनै किताब नछोडी लिन पनि सक्नुहुन्छ र कुनै किताब नलिई छोड्न पनि सक्नुहुन्छ ! ” भन्ने पनि लेखेर टाँसिनेछ ।