- स्यानफ्रान्सिस्को/ क्यालिफोर्निया
नेपाली सांगीतिक क्षेत्रमा छुट्टै पहिचान बनाएको नेपालकै चर्चित म्यूजिकल समुह ‘नेपथ्य’को यही अगष्ट १० तारेख शनिवार स्यानफ्रान्सिस्कोमा हालसम्मकै सबैभन्दा ठूलो सांगितिक प्रस्तुतिको तयारी भएको छ । २५ सय भन्दा बढी दर्शक अटाउने क्षमता भएको स्यानफ्रान्सिस्कोको वारफिल्ड थिएटरमा ‘नेपथ्य’ले आगामी अगष्ट १० मा ऐतिहाँसिक सांगितिक प्रस्तुति दिने भएको हो । वारफिल्ड थिएटर स्यानफ्रान्सिस्को शहरको ठूलो सांगितिक कार्यक्रम हुने थिएटर हो ।
बे एरियामा चर्चित इभेण्ट्स गर्दै आएको ‘विन्दास टोली’ले नेपथ्यको ऐतिहासिक कार्यक्रम गर्न लागेको हो । ‘नेपथ्य जस्तो लोकप्रिय र लामो इतिहास भएको नेपाली ब्याण्डलाई स्यानफ्रान्सिस्को सुन्दर शहरमा प्रस्तुत गर्न पाउँदा हामी एकदमै उत्साहित छौं,’ विन्दास टोलीका कार्यक्रम संयोजक असिम गजुरेलले भने- ‘यो ऐतिहासिक सांगितिक कार्यक्रमलाई सार्थक बनाउन हामी सबै नेपालीहरुको साथ सहयोगको अपेक्षा गर्दछौ ‘। गजुरेलले हालसम्म झण्डै ८० प्रतिशत टिकट विक्री भइसकेको र कार्यक्रमको मिति नजिकिदै जाँदा टिकट विक्री निकै बढिरहेको जानकारी दिए I ‘हाम्रो लक्ष्य २५ सयको सहभागीता हो र सबैतिरबाट निकै राम्रो प्रतिकृया आइरहेको छ’,- गजुरेलले भने ।
नेपथ्य समूहको कन्सर्ट हेर्न बे एरियाका नेपालीहरु पनि निकै आतुर र व्यग्र देखिएका छन् । प्रायः सबैका फेसबुकका पोस्टहरु नेपथ्य समूहको कन्सर्टको कार्यक्रमले सजिएका छन् ।
‘नेपथ्य हाम्रो संगीतको ठूलो मात्र होइन ढुकढुकी पनि हो, नेपाली जनसम्पर्क समिति क्यालिफोर्निया च्याण्टरका कार्यवाहक सभापति नारायण खनालले भने – ‘हाम्रा वालवालिकाहरु सयौं डलर तिरेर यहाँको कन्सर्ट हेर्न जान्छन्, अब हामीले हाम्रा पुस्तालाई आफ्नो गीतसंगीत सिकाउनु पर्छ र हामी सबैले यसलाई कन्सर्टलाई ऐतिहासिक बनाउनुपर्छ । ‘धेरै वर्षपछि नेपथ्यको कन्सर्र्ट हेर्न पाउछौ भनि गर्व लागिरहेको छ’-उनले थपे । समाजसेवी एवं व्यावसायी हरिहर दाहालले आफ्नो सामाजिक सञ्जाल फेसबुकमा सबैलाई अगष्ट १० मा नेपथ्यको कन्सर्टमा सहभागी हुन आग्रह गर्दै लेखेका छन् -“भुईंमा उम्रेर , भुईंमा हुर्केर , भुईंमै लटरम्म फलेका भुईं मान्छे हुँन अमृत गुरुङ। मनबाट श्रद्धा गरीने थोरै नेपाली मद्धेका एक हुँन उनी । उनी सामाजिक सद्भाब र एकताका प्रतिक पनि हुँन।
दाहाले अगाडि लेखेका छन् – यि भुईं मान्छे १० तारिक सनिबारको दिन सानफ्रान्सिस्कोमा आउने कुराले हामी उत्साहित् भएका छौं। सुने अनुसार , यो उनको अन्तिम संगितिक यात्रा हुनेछ। सिमाना र समाज जोड्ने अशल मान्छेका लागि यो नागरिक अभिनन्दन पनि हो । मिल्ने र भ्याउने जती हामी सबै जाँउ है “।
बे एरियाका सक्रिय सामाजिक युवा केपी ढकालले नेपथ्यको कन्सर्ट हेर्न बे एरियाका हर तप्काका नेपालीहर आतुर भएको बताए l ‘मैले त टिसर्ट लगाएर हिडिसकेको छु’,- उनले भने-‘अब अगष्ट १० को मात्र प्रतिक्षा छ ‘l
टिकटका लागि आयोजकले बनाएको ब्रोसरमा रहेको ‘क्यूआर कोड’ स्क्यान गरेर टिकट बुक गर्न सकिने आयोजकले जानकारी दिएका छन् । नेपथ्यले लोक संगितलाई रक शैलीमा गाएर नेपाली संगितलाई अन्तराष्ट्रियकरण गर्न ठूलो भूमिका खेलेको छ । नेपथ्य समूह नेपालमा आन्तरिक द्वन्द्व चलिरहँदा शान्तिका लागि शिक्षा अभियान लिएर गाउँ गाउँमा पुगेको थियो ।
कार्यक्रमलाई सफल बनाउनका लागि नेपाली गीत संगीतप्रमी तथा शुभेक्षुकहरुलाई कार्यक्रममा आएर सहयोग गरीदिन आयोजकले अनुरोध गरेका छन् ।
नेपाली श्रोता र दर्शकहरुबीच चर्चित ब्याण्ड नेपथ्यले नयाँ र सर्वकालिक हिट गीतहरु प्रस्तुत गर्ने बताइएको छ । दर्शकको भावनालाई बुझेर स्टेजमा प्रस्तुती दिने साथै नाच्न र नचाउन माहिर समूह नेपथ्यले बेलायतको वेम्ब्ली स्टेडियम लगायत विदेशका ६५ तथा स्वदेशमा ५० बढी स्थानमा कन्सर्ट गरिसकेको छ ।
नेपथ्यको अमेरिकाको म्युजिकल टुर अगस्ट ३ बाट कोलोराडो बोल्डर थियटरबाट सुरु भएको छ । कोलोराडोको प्रस्तुती निकै भव्य भएको थियो । नेपथ्यले अगस्ट ६ र ७ मा पेन्सिलभेनियाको द फोरम अडिटोरियममा अगस्ट १० मा सान फ्रान्सिस्कोको द वारफिल्ड, अगस्ट १७ मा ओहायोको केम्बा लाइभ तथा अगस्ट २४ मा टेक्सासस्थित अर्भिङको टोयोटा म्युजिक फ्याक्ट्रीमा सांगितिक प्रस्तुति दिने तय भइसकेको छ । त्यस्तै अगस्ष्ट २३ मै बस्टनको रोयलमा पनि नेपथ्यको सांगितिक कार्यक्रम राखिएको छ ।
छेक्यो छेक्यो.. , चरि मर्यो सिसैको गोलीले.. , तालको पानी .., जोगले हुन्छ भेट …, जीमसोमे बजारमा … जस्ता सर्वाधिक प्रिय गीतका सर्जक नेपथ्य समूहमा गायक अमृत गुरुङ, ध्रुव लामा, सुविन शाक्य, निरज गुरुड, दिनेशराज रेग्मी र शान्ति बहादुर रायमाझी छन् ।
प्रतिक्रिया लेख्नुहोस्:-