अगष्ट १७
स्यानफ्रान्सिस्को । क्यालिफोर्निया
नेपालका चर्चित एवं बरिष्ठ अभिनेताद्धय शिव श्रेष्ठ र सुनिल थापाको सम्मानमा यही अगष्ट २० गते आइतवार गोल्डेनस्टेट मुभी मेकर एलएलसीले मिट, ग्रिट एण्ड विसेस एक्सचेन्ज (भेटघाट एवं शुभकामना आदानप्रदान कार्यक्रम)को आयोजना गरेको छ । कार्यक्रम बर्कलीस्थित हिमालयन फ्लेवर रेष्टुरेण्टमा आइतवार बेलुकी ७ बजेवाट शुरु हुनेछ ।
गोल्डेनस्टेट मुभी मेकर एलएलसीका संचालक यज्ञलाल श्रेष्ठका अनुसार नेपालको सिनेमा जगतका हस्तीहरुको सम्मान एवं बे एरियामा बसोवास गर्ने नेपालीहरुसंग प्रत्यक्ष भेटघाट एवं शुभकामना आदानप्रदान र सांगितिक कार्यक्रमको लागि यस कार्यक्रमको आयोजना गर्न लागिएको हो । “शिव श्रेठ र सुनील थापा दाईहरु भनेको नेपाली सिने जगतका लिजेण्ड र धरोहर हो, यसकारण उहाँहरुको सम्मान गर्नु नेपाली चलचित्र जगतको सम्मान गर्नु हो”, श्रेष्ठले दूरवीन नेपालसंग भने- “आइतवार बे एरियावासीले उहांहरुसंग प्रत्यक्ष भेटघाट गर्ने र सांगितिक कार्यक्रम मनोरन्जन लिन सक्नुहुनेछ”।
बे एरियाका प्रसिद्ध व्यावसायी एवं समाजसेवी श्रेष्ठले लामो समयदेखि नेपाली चलचित्रको उत्थान एवं प्रवर्धन र एवं कलाकारहरुको सम्मानमा ग्लोवल फिल्म फेष्टिवल लयागतका कार्यक्रम गर्दै आएका छन् । सन् २०१९ मा बर्कलीमा आयोजना गरिएको चौथो ग्लोवल फिल्म फेष्टिवलमा श्रेष्ठको विशेष पहलमा नेपालका चर्चित नायकहरु राजेश हमाल, शिव श्रेष्ठ र भूवन केसी संगै नेपाली फिल्मी जगतका भिष्म पितामह नीर शाह एउटै मंचमा उपस्थित भएका थिए । यस अघि उनीहरु एकै कार्यक्रममा एकै मंचमा उपस्थित हुने गरेका थिएनन् । उक्त कार्यक्रम नेपाल लगायत विश्वभर रहेका नेपालीवीच निकै चर्चित भएको थियो । श्रेष्ठले आगामी आइतवार सन् २०२४ को सेप्टेम्वरमा हुने गोल्डेन नेपाली फिल्म अवार्डको घोषणा गर्ने जानकारी दिएका छन् ।
प्रतिक्रिया लेख्नुहोस्:-