अमृत कुँवर ।
सानफ्रानसिस्को ।
अमेरिकामा नेपालीहरूको सङ्ख्या थपिँदै जाँदा गीत, सङ्गीतकर्मीहरूका लागि प्रस्तुति दिने एउटा प्रमुख गन्तव्य बन्न पुगेको छ अमेरिका । 
फर्की फर्की नहेर मलाई, निश्चल, खसेका तारा, भूल लगायत दर्जनौँ चर्चित गीतहरू गाइसकेको नेपालको रकब्याण्ड अलबटरस साङ्गीतिक यात्रा लिएर अमेरिकाको विभिन्न सहरमा आउँदै छ । नेपालीहरू उल्लासको मुडमा रहने दसैँको मौका छोपेर अलबटरसले अमेरिकाको साङ्गीतिक भ्रमण तालिका सार्वजनिक गरेको हो । अमेरिका भित्र धेरै नेपालीहरू बस्ने सानफ्रानसिस्को बे एरिया पनि उनीहरूको तालिकामा परेको छ ।
प्रोजेक्ट इन्टरटंनमेन्टद्वारा आयोजना गरिएको सो कन्सर्ट अक्टोबर १८, २०१९ शुक्रवारको दिन क्यालिफोर्निया राज्यको ओकल्याण्ड सहरमा हुँदै छ । नेपाली गीत सङ्गीतमा झुम्न चाहने नेपालीहरूले त्यस दिन अन्तर्राष्ट्रिय स्तरको नाईट् क्लब द न्यु पेरिसमा हुने कन्सर्टमा मस्ती उठाउन पाउने छन् ।
कार्यक्रममा लाइभ कन्सर्ट बाहेक वे एरिया को चर्चित डिजे कान्छाको डिजे सेसन र स्थानीय ब्याण्डको पनि प्रस्तुति समेत रहने कुरा आयोजक समूहले जनाएको छ । उक्त कन्सर्टमा जानको लागि कम्तीमा पनि १८ वर्ष माथिको उमेर को हुनु पर्ने छ । कन्सर्टलाई भव्य र सभ्य बनाउनको लागि तयारी भइरहेको आयोजकले बताएका छन् । यो कन्सर्टलाई सफल बनाउन विकल्प फाउण्डेशन सह आयोजक बनेको छ । प्रवेशका लागि टिकट प्रोजेक्ट इन्टरटंनमेन्टको फेसबुक पेज उपलब्ध छ । कार्यक्रमका सम्बन्धमा आयोजक उद्धव के सी , हरि ओझा र विकेन्द्र बोहोराले आवश्यक जानकारी गराउने छन् ।
प्रतिक्रिया लेख्नुहोस्:-