अमेरिकामा ‘रजतपट अंकल’लाई भ्याईनभ्याई !

स्यानफ्रान्सिस्को ।
सेप्टेम्वर २
“रजतपट अंकल”को नामले चर्चित सेलिब्रेटी रंग पत्रकार एवं कार्यक्रम प्रस्तोता प्रकाश सुवेदी यतिवेला अमेरिकाका विभिन्न राज्यहरुमा नेपालीले उनको सम्मानमा आयोजना गरेका कार्यक्रममा निकै ब्यस्त रहेका छन् । “रजतपट विश्वयात्रा”को क्रममा पत्रकार सुवेदी अमेरिका आएका हुन् । कार्यतालिका अनुसार उनलाई अमेरिकामा यतिवेला “भ्याइनभ्याइ” नै छ ।

अगष्ट महिनाको अन्तिम साता जर्जिया उडेका पत्रकार सुवेदीको सम्मानमा नेप्लिज एसोसिएसन अफ साउथ इष्ट अमेरिका (नासा)ले शनिवार “मिट एण्ड ग्रीट वीथ प्रकाश सुवेदी” नामका एक विशेष कार्यक्रमको आयोजना गरेको थियो । कार्यक्रमको प्रमुख आकर्षण बनेका पत्रकार सुवेदीसंग कार्यक्रममा उपस्थित दर्शकहरुले ब्यग्र प्रतिक्षाका साथ प्रश्नोत्तर गरेका थिए ।

यसअघि उनको सम्मानमा अलवामा राज्यमा रहेको क्याल्हन कम्युनिटी कलेजमा एक विशेष कार्यक्रमको आयोजना गरियो । कार्यक्रममा सुवेदीले संचालन गरेको ‘रजतपट’र ‘द प्रकाश सुवेदी शो’ को दर्शकहरुले प्रशंशा गर्दै कार्यक्रमको प्रगतिको कामना गरेका थिए ।
जर्जिया राज्यमा रहेका नेपाली समाजका अभियन्ता एवं पर्यटनदूत राजा घले लगायतले प्रकाश सुवेदीले नेपाली चलचित्र क्षेत्रलाई अन्तराष्ट्रिय जगतमा विस्तार गर्न ठूलो योगदान पुर्याएको बताएका थिए । उनको सम्मानमा विश्व हिन्दु महासंघ एटलाण्टा शाखाले पनि कार्यक्रम गरेको थियो ।

दूरवीनसंग कुरा गर्दै चर्चित पत्रकार सुवेदीले अमेरिकाको भ्रमणवाट आफूलाई नै चिन्ने मौका मिलेको बताए-“वास्तवमा हाम्रो कार्यक्रम अमेरिकामा यति धेरै लोकप्रिय छ र हामीलाई यतिधेरै सम्मान मिल्छ भन्ने सोचेका थिएनौ, यस सम्मान र नेपाली समुदायले देखाएको अपार स्नेह र लगाववाट निकै उत्साही भएको छु” , उनले भने ।

कार्यक्रम तालिका अनुसार पत्रकार सुवेदी जर्जियावाट ओहायो पुग्नेछन् । त्यहाँ रहेका नेपाली एवं भूटानी मुलका नेपालीहरुसंग उनले अन्तरकृया र भेटघाट गर्नेछन् । ओहायो राज्यमा मात्रै उनको सम्मानमा ५ वटा कार्यक्रम राखिएको छ ।
ओहायोपछि कोलोराडोको डेनभर र टेक्सासको ड्यालस र अस्टिन शहरमा उनको सम्मानमा ‘मीट एण्ड ग्रीट वीथ प्रकाश सुवेदी’ कार्यक्रमको आयोजना गरिएको छ । त्यहाँ उनले नेपाली सिनेमाको बर्तमान अवस्था र बजार विविधिकरण लगायतका विषयमा नेपालीहरुसंग छलफल गर्नेछन् । त्यसैगरि, नेपाली कलाकारहरुको बाहुल्यता रहेको वाल्टिमोर, भर्जिनिया र बासिंगटन डीसीमा पनि उनको सम्मानमा कार्यक्रम आयोजना गरिएको छ । बाल्टिमोरमा उनको सम्मानका नेपालमा चर्चित रहेका २२ जना कलाकारसंग पिकनीकको कार्यक्रम समेत राखिएको छ ।

कार्यक्रमकै शिलशिलामा पत्रकार सुवेदी नेपालीहरुको बाहुल्यता रहेको न्यूयोर्क जानेछन् । त्यहाँ पनि उनले नेपाली सिनेमाको विकास र अन्तराष्ट्रियकरण लयागतका विषयमा कार्यक्रममा सहभागीहरुसंग अन्तरकृया गर्नेछन् । न्यूयोर्कमा उनको सम्मानमा “मिट एण्ड ग्रिट कार्यक्रम “राखिएको छ ।
नेपालीहरुसंग अन्तरकृया र भेटघाटको शिलशीलामा उनी क्यानडाको राजधानी टोरन्टो पनि जाने कार्यक्रम तय भएको छ । टोरन्टोमा रहेका एक नेपाली विश्व भण्डारीले प्रकाश सुवेदीलाई आफूले टिभीमा देखेको र उनको प्रश्न सोध्ने शैलीको फ्यान भएको बताउदै भने,-‘म उहाँलाई भेट्न पाउने खवरले निकै उत्साहित भएको छु ‘।
‘यसपटकको मेरो अमेरिका बसाईको अन्तिम कार्यक्रम क्यालिफोर्नियाको स्यानफ्रान्सिस्कोमा हुने छ,’ पत्रकार सुवेदीले भने, “अन्य ठाउहरुवाट पनि साथीहरुले निम्ता गरिरहनु भएको छ तर यसपटक भ्याइएला जस्तो छैन” । उनले अमेरिकामा नेपाली चलचित्रले राम्रो ब्यापार गर्न सक्ने संभावना रहेको र आफ्नो कार्यक्रमले त्यसलाई थप प्रोत्साहित गर्ने बताए ।

त्यसो त पत्रकार सुवेदीले सोध्ने गरेका प्रश्नहरु आफैमा टिकटकमा ट्रोल र भाइरल हुने गरेका छन् । नेपालका चर्चित सिनेकर्मी, रंगकर्मी एवं नेताहरुलाई आफ्नो “द प्रकाश सुवेदी शो “मा ल्याएर ‘धर्मसंकट’ र ‘ब्याख्या नगरिकन’ जस्ता प्रश्नहरु सोधेर हायलकायल पार्ने  शैली सामाजिक संजालमा “ट्रोल” नै बन्ने गरेको छ ।