जाङ्बु शेर्पा, दूरबिन नेपाल
नेपाली पर्वतारोही निर्मल पुर्जाले ७ महिनामा ८ हजार मिटर माथिका १४ ओटा हिमाल आरोहण गरी नयाँ विश्व किर्तीमान कायम गरेका छन । यसअघि यो किर्तीमान पोल्यान्डका जेर्जी कुकुक्जाको नाममा थियो । पोल्यान्डका जेर्जी कुकुक्जाले आठ वर्ष लगाएर सन् १९८७ मा सो र्किर्तिमान वनाएका थिए । पूर्व बेलायती जलसेना समेत रहेका नेपाली नागरिक पुर्जाले सोमबार चीनको शिशिपाङ्मा हिमालको सफल आरोहण सम्पन्न गरेपछि आरोहणको नयाँ विश्व रेकर्ड बनेको हो । सन् २००३ मा बेलायती सेनामा भर्ती भएका निर्मल पुर्जाले जलसेनामा आबद्ध भएर काम गरेका थिए । संसारभर आठ हजार मिटरभन्दा अग्ला १४ वटा हिमाल मात्रै छन । ती सवै हिमाल पुर्जाले एक सय ८९ दिनमै आरोहण गरेका हुन् । म्याग्दीका ३५ वर्षीय निर्मलले २०१९ मा ब्रिटिस आर्मीको जागिर छाडेर अप्रिलबाट हिमाल आरोहण अभियान थालेका थिए । सेप्टेम्बरमा उनको अभियान तिब्बतमा रहेको शीशापाङ्मा हिमाल चढ्न चिनियाँ सरकारले अनुमति नदिँदा रोकिएको थियो । नेपाल सरकारले चिनियाँ सरकारलाई अनुरोध गरेपछि उनले अक्टोबर १५ मा अनुमति पाएका थिए । पुर्जाले गएको एप्रिलमा आफ्नो अभियान शुरू गरेका थिए र मेमा सगरमाथा आरोहण गरेका थिए । उनले त्यहाँ खिचेको भिडियो र तस्बिरले संसारको ध्यान खिचेको थियो । उनले सगरमाथा, लोत्से र मकालु हिमाल पाँच दिनमा चढेका थिए ।
पुर्जाले चढेका हिमाल र सफल आरोहणको मिति यसप्रकार रहेको छ ः
अन्नपूर्ण, नेपाल, एप्रिल २३
धौलागिरी, नेपाल, मे १२
कञ्जनजङ्गा, नेपाल, मे १५
सगरमाथा, नेपाल, मे २०
लोत्से, नेपाल, मे २२
मकालु, नेपाल, मे २४
नाङ्गापर्वत, पाकिस्तान, जुलाई ३
जी १, पाकिस्तान, जुलाई १५
जी २, पाकिस्तान, जुलाई १८
के २, पाकिस्तान, जुलाई २४
ब्रोड पिक, पाकिस्तान, जुलाई २६
चो यू, चीन, सेप्टेम्बर २३
मनास्लु, नेपाल, सेप्टेम्बर २७
शीशापाङ्मा, चीन, अक्टोबर २९
प्रतिक्रिया लेख्नुहोस्:-