दार्चुला, १० मङ्सिर
नेत्रविक्रम चन्द समूह निकटका छ विद्यार्थीलाई प्रहरीले पक्राउ गरेको छ । भारतले कालापानी, लिपुलेक र लिम्पियाधुरालाई समेट्दै नयाँ नक्सा सार्वजनिक गरेपछि त्यसको विरोध गर्न सदरमुकाम खलङ्गा आएका उनीहरुलाई प्रहरीले पक्राउ गरेको हो ।
विरोध कार्यक्रम गर्नुअघि नै प्रहरीले विद्यार्थीलाई पक्राउ गरेको हो । पक्राउ पर्नेमा डडेल्धुराको भागेश्वर गाउँपालिका–३ का २२ वर्षीय ललित सार्की र पर्शुराम नगरपालिका–५ का २३ वर्षीय गणेश बोहरा, बझाङको बुङ्गल गाउँपालिका–४ का २९ वर्षीय तिलक कुँवर र खप्तड छन्ना गाउँपालिका–८ का २५ वर्षीय सुभास जोशी, दार्चुलाको मार्मा गाउँपालिका–४ का १९ वर्षीय धनसिंह धामी र बाजुराको बूढीगङ्गा नगरपालिका–१० का २१ वर्षीय दीपक रावत छन् ।
यस अघि नेपाल विद्यार्थी संघले नेपाली भूभाग माथि भारतीय पक्षबाट भएको अधिकरणको विरोधमा भारतीय दूतवास अगाडि आयोजना गरेको प्रदर्शनमा नेपाल सरकारले सुरक्षाकर्मी लगाएर दमन गरेको थियो । सो प्रदर्शनमा दर्जनौँ विद्यार्थी घाइते भएका थिए । आफ्नो भूभाग फिर्ता गराउन नेपाल सरकारले औपचारिक संवाद र समाधानका लागि ठोस पहल गर्न सकेको देखिदैन ।
प्रतिक्रिया लेख्नुहोस्:-