स्यानफ्रान्सिस्को । अमेरिकामा बसोवास गर्ने नेपालीहरुको पहलमा स्थापना गरिएको एभरेष्ट फेडरल क्रेडिट यूनियनको वारेमा जानकारी दिने उदेश्यले गत आइतवार एक अन्तरकृयात्मक कार्यक्रमको आयोजना गरियो ।
अमेरिकामा बसोवास गर्ने नेपालीहरुद्धारा संचालित नेपाली समुदायको आर्थिक उन्नतिको लागि समर्पित नेपालीहरुको आफ्नै बैंक भन्ने नाराका साथ सो बैकको स्थापना गरिएको जानकारी सो कार्यक्रममा दिइएको थियो ।
कार्यक्रममा नेपाली दूतावास वासिंगटन डिसीका नियोग प्रमूख कुमार खरेलले अमेरिकामा नेपालीहरुको पहलमा बैकको स्थापना हुनु गौरवको विषय भएको उल्लेख गर्दै अमेरिका हरेक नेपालीको लागि अवसरको रुपमा रहेको बताए । अमेरिकामा हरेक नेपाली अवसरको रुपमा कोलम्वस हो, यहाँ प्रगति र उन्नतिको लागि हरेक ढोका खुल्ला छ, नियोग प्रमुख खरेलले भने अव नेपालीहरुको लक्ष्य आर्थिक विकासमा हुनुपर्छ ।
क्यालिफोर्नियाका लागि नेपालका अवैतानिक महावाणिज्यदूत रिषी ढकालले अमेरिकाका विभिन्न राज्यहरुमा नेपालीहरुको जनघनत्वसंगै व्यावसायिक गतिविधि बढेकाले नेपालहरुको आफ्नै बैकको स्थापना हुनुलाई सफलताको रुपमा लिइइनुपर्ने उल्लेख गर्दै यस बैकवाट अमेरिकामा रहेका बसै नेपालीहरु लाभान्वित हुने विश्वास ब्यक्त गरे ।
क्रेडिट यूनियनका सदस्य सचिव एवं संस्थापक सदस्य डिल्ली भट्राईले बैंक स्थापनाको उदेश्य र लक्ष्यवारे प्रकाश पार्दै अमेरिकामा बढ्दो नेपालीहरुको संख्या र आर्थिक पहुचलाई थप विकास र विस्तारको आवश्यकता रहेकोले त्यसको सहजीकरणको लागि नेपालीहरुको आफ्नै बैक स्थापना भएको बताए । उनले सबै नेपालीहरु बैकको संस्थापक हुन सक्ने जानकारी दिदै यस बैकको उदेश्य नेपालीहरुको आर्थिक विकास र उन्नति रहेको स्पष्ट पारे ।
बैकको परिचय र स्थापनाकोउदेश्यमाथि प्रमुख कार्यकारी अधिकृत राज विराज रिजालले प्रकाश पारेका थिए । कार्यक्रममा युनिभर्सिटि अफ क्यालिफोर्निया बर्कलीका प्राध्यापक डा आमोद पोखरेल, युनिभर्सिटी अफ स्यानफ्रान्सिस्का प्राध्यापक डा टीका लम्साल, संचारविज्ञ सहजमान श्रेष्ठ, नेपाली जन सम्पर्क समितिका कार्यबाहक सभापति नारायण खनाल, कानुन व्यावसायी लक्ष्मण अधिकारी, लाइन्स क्लवका पूर्व गभर्नर एवं मोटिभेस्नल स्पीकर राजेन थापा, एनआरएनए का सुरेन्द्र मल्ल, आदिवासी जनजाती महासंघका प्रकाश लामा लगायतका ब्यक्तिहरुले बैंकको स्थापना र नेपालीले पाउने सुविधा लगायतको सम्वन्धमा प्रश्नोत्तर गरेका थिए ।
एभरेष्ट फेडेरल क्रेडिट यूनियनको नयाँ सदस्य बन्न वा विस्तृत जानकारी www.everestfsu.org मा हेर्न सकिने जानकारीे सदस्य सचिव डिल्ली भट्राईले दिएका थिए ।
प्रतिक्रिया लेख्नुहोस्:-