‘महापुरुष’ले सपरिवार फिल्म हेर्ने वातावण सृजना गरेको छ : हरिवंश आचार्य

नेपाल र  विभिन्न देशहरुमा सर्वाधिक लोकप्रिय र लगातार छैटौं हप्तामा चलिरहेको नेपाली चलचित्र “महापुरुष”का मुख्य नायक एवं अभिनेता हरिवंश आचार्य यतिवेला अमेरिकामा छन् । समता स्कुलको सहयोगार्थ अमेरिकामा विभिन्न शहरहरुमा प्रस्तुती दिएका मह जोडी यतिवेला “महापुरुष”को ब्यावसायिक सफलता र दर्शकवाट आएको प्रतिकृयावाट पुलकित र व्यावसायिक सफलतावाट दंग छन् । यसै सेरोफेरोमा अभिनेता आचार्यसंग दूरवीन नेपालले चलचित्र महापुरुषको सम्वन्धमा गरेको कुराकानीका केही सम्पादित अंशहरु

दूरवीन: नेपालमा ‘महापुरुष’को सफलतासंगै  अमेरिकाका विभिन्न शहरहरुमा पनि महापुरुष चलिरहेका छ । यहाँ कस्तो प्रतिकृया पाउनुभएको छ

हरिवंश आचार्य: हामी एक विशेष कार्यक्रमको लागि यहाँ आएका थियौ । खासमा हामी अघिअघि ‘महापुरुष’ पछिपछि जस्तो भएर आएको जस्तो भएको छ । हामी जति जति ठाउमा गयौ, त्यहाँवाट एकदमै राम्रो प्रतिकृया आएको छ । सामाजिक संजालहरुमा पनि एकदमै समारात्मक प्रतिकृयाहरु आएकोे छ । केहीदिन अगाडि फ्लोरिडाको वेष्ट पामवीचमा हामीले पनि दर्शकहरुसंगै बसेर महापुरुष हेर्यौ । वास्तवमा मैले पनि पुरै फिल्म हेरेको थिइन । यही अमेरिकामा नै दर्शकहरुसंग बसेर हेरें । मलाइ पनि आफैमा सन्तुष्टी लाग्यो । उहाँहरुको एमदम राम्रो प्रतिकृया पाएं । स्यानफ्रान्सिस्कोवाट पनि राम्रो रेस्पोन्स पाइरहेका छौ । टेक्ससको ड्यालसमा त छैटौ हप्तौंदेखि ‘महापुरुष’ चलिरहेका छ । अमेरिकाका अन्य शहरहरुमा प्रदर्शनको तयारीमा छ । डिसी र वोष्टनमा महापुरुष हेर्ने दर्शकहरुवाट धेरै नै राम्रो प्रतिकृया आएको छ । न्यूयोर्क, न्यूजर्सी र अन्य शहरहरुमा पनि दर्शनको तयारीमा साथीहरु लाग्नुभएको छ ।

दूरवीन: ‘महापुरुष ‘ ‘मह ‘जोडीको कारण यति धेरै लोकप्रिय भएको हो कि प्रस्तुत गरिएको विषयबस्तुको कारण ?

आचार्य: चलचित्रमा प्रस्तुत विषयबस्तुलाई मेसेजको रुपमा नै दर्शकहरुले धेरै मन पराएको पाइयो । अभिनय त दोश्रो पाटो भयो । वास्तवमा कथा त अव संसारको एकै खालको जस्तो नै भइसक्यो । चाहे तपाई अमेरिका, यूरोप वा अफ्रिकाको एकल महिला वा पुरुषको कथा भन्नुस वा नेपालको, त्यसमा समानता पाइन्छ । तर विषयवस्तुलाई कसरी प्रस्तुत गरिन्छ र त्यसले आम मानिसमा कस्तो सन्देश प्रवाह गर्छ भन्ने मूख्य कुरा हुन आउंछ । हो, यसकारण निर्देशक प्रदीप भट्राईले जसरी एउटा जटिल खालको विषयबस्तुलाई सरल र सहज रुपमा आम मानिसको मन र मस्तिष्कमा छुने गरि मर्मस्पर्शी तरिकाले प्रस्तुत गर्नुभएको छ, यो नै यस चलचित्रको सफलताको मुख्य कडी हो । एउटा वालकदेखि ९१ बर्षको आमा समेतलाई यो चलचित्रको विषय र प्रस्तुतीले छोएको छ । यो नै सफल निर्देशकको एक उत्कृष्ट कार्य र उसको सफलताको मापन हो ।
दूरवीन :चलचित्र हेरेपछि कतिपय प्रतिकृयाहरु चाही हरिवंश आचार्यकै जीवनमा आधारित विषयबस्तुलाई प्रस्तुत गरिएको भन्ने पनि सुनियो । के यहाँलाई यस्तो लाग्छ?
आचार्य : जव महिला वा पुरुष एकल हुन्छ र ऊ आफ्नो सन्तानको खुशीलाई आफ्नो खुशी ठान्न बाध्य हुन्छ, यो संसारका सबै महिला वा पुरुषहरुको जीवनमा आधारित रहेको हुन्छ । चलचित्रमा मेरो जीवनका केही भोगाइहरु मेल खाएपनि यो संसारका सबै एकल महिला तथा पुरुषको अनुभव र भोगाईको कथा हो । मैले अघिपनि भने, मूख्य त विषयबस्तुको प्रस्तुती र त्यसले प्रदान गर्ने सन्देश नै हो । यसकारण यो प्रत्येक समुदाय र घरघरको कहानी हो ।
दूरवीन :कन्टेन राम्रो भयो भने नेपाली चलचित्रले पनि व्यावसायि क सफलता पाउछन् भन्ने यसको अर्काे सन्देश हो?
आचार्य : ‘महापुरुष’को एक विशेषता चाही अरु भन्दा भिन्न के रह्यो भने सपरिवार हलमा भएर फिल्म हेर्ने वातावरणको सृजना भयो । हलमा फिल्म हेर्ने भनेको कि श्रीमति, गर्लफ्रेन्ड वा साथीभाईसंग मात्र बसेर हेर्ने भन्ने ट्रेन्ड चाही यसले ब्रेक गर्याे । छोराछोरी आफ्ना आमाबालाई लिएर अथवा पुरै परिवार नातागोता संगै बसेर फिल्म हेरेका पाइयो । २७ २८ जनाले एकैपटक हलमा गएर महापुरुष हेरेको दृश्य सामाकि संजालहरुमा देखियो । महापुरुष हेर्न ९१ बर्षको आमालाई लिएर छोरा हलमा गएका छन् । ८४ बर्षका बा ले छोरासंग बसेर हेरेका छन् । यसकारण यो पूर्णरुपमा पारिवारिक चलचित्र छ । यसले समाजका विभिन्न आयामहरुलाई जोडेको छ । महापुरुष हेरेपछि हरेक दर्शकलाई कथाबस्तुले छोएको हुन्छ । यसकारण यसले व्यावसायिक सफलता प्राप्त गरेको हो जस्तो लाग्छ ।