स्यानफ्रान्सिस्को/क्यालिफोर्निया
दुरवीन संवाददाता
डिसेम्बर २१ शनिवार स्यानफ्रासिस्को वे एरियाको रिचमण्डमा सम्पन्न ‘पहिलो गोल्डेन नेपाली फिल्म अवार्ड कार्यक्रम २०२४’मा अभिनेता अनमोल केसी र अभिनेत्री आँचल शर्माले उत्कृष्ट अभिनेता अभिनेत्रीको अवार्ड प्राप्त गरेका छन् । अभिनेता अनमोल केसीले फिल्म ‘फर्कि फर्कि’ र आँचलले फिल्म ‘डिग्री माइला’ मा प्रदर्शन गरेको अभिनयका कारणले उत्कृष्ट अवार्ड प्राप्त गरेका हुन् । यसैगरी सर्वोत्कृष्ट फिल्मको अवार्ड दिनेश राउतले निर्देशन गरेको ‘पुजार सार्की’ ले हात पार्यो भने सोही फिल्मका निर्देशक राउतले उत्कृष्ट निर्देशक अवार्ड समेत प्राप्त गरेका छन् ।
सोही अवार्ड वितरण कार्यक्रममा अभिनेता शिव श्रेष्ठ ‘लाइफ टाइम एचिभ्मेन्ट’ अवार्डबाट सम्मानित भएका छन् । अभिनेता श्रेष्ठलाई ४० वर्षभन्दा वढी चलचित्र जगतमा पुऱ्याएको योगदान र अभिनय क्षमताको आधारमा सो लाइफ टाइम सो अवार्डले सम्मान गरिएको थियो ।
प्राप्त समाचार अनुसार मिति २०८० साउनदेखि ०८१ असार मसान्तभित्र नेपालका सिनेमा घरमा प्रदर्शन भएका नेपाली चलचित्रहरू अवार्डमा समावेश गरिएको थियो ।
कार्यक्रममा आयोजक यज्ञलाल श्रेष्ठले नेपाली कला र कलाकारको सम्मान एवं अन्तराष्टियकरणको लागि आफूहरुले अवार्ड कार्यक्रमको आयोजना गरेको बताए । बरिष्ठ अभिनेता नीर शाहले विदेशमा हुने अवार्डले नेपाली कला र कलाकारको गौरव बढ्ने बताउँदै अवार्डको निरन्तरताको कामना गरे । कार्यक्रममा हास्यकलाकारहरु जीतु नेपाल,माग्ने बुढो (केदार घिमिरे) तक्मे बुढो, रिमा विश्वकर्मा लगायतले विभिन्न प्रस्तुतीहरु दिएका थिए । वरिष्ठ अभिनेता शिव श्रेष्ठ,वरिष्ठ अभिनेता सुनिल थापा,चर्चित अभिनेत्री तथा निर्देशक दीपाश्री निरौला, वरिष्ठ छायाँकार गौरीशङ्कर धूजु श्रेष्ठ,अभिनेता सुनिल कटुवाल र वरिष्ठ चलचित्र पत्रकार तथा निर्देशक लक्ष्मण सुवेदी रहेको जुरीले अवार्ड चयन गरेको थियो । त्यसैगरी डिसेम्बर २२ मा बर्कलीमा ‘नेपाल डे परेड’ सम्पन्न भयो भने सोही साँझ कलाकारसंग क्रुज पार्टी समेत गरिएको थियो ।
कसले पाए अवार्ड ?
लाइफ टाइम एचिभ्मेन्ट – शिव श्रेष्ठ
सर्वोत्कृष्ट अभिनेता– अनमोल केसी (फर्की फर्की)
सर्वोत्कृष्ट अभिनेत्री– आँचल शर्मा (डिग्री माइला)
पपुलर अभिनेता : प्रदीप खड्का
पपुलर अभिनेत्री : केकी अघिकारी
सर्वोत्कृष्ट फिल्म : पुजार सार्की
सर्वोत्कृष्ट निर्देशक : दिनेश राउत
सर्वोत्कृष्ट लेखन : दीपेन्द्र लामा (नाङ्गो गाउँ)
सर्वोत्कृष्ट छायांकन : आलोक शुक्ला (नाङ्गो गाउँ)
सर्वोत्कृष्ट सम्पादन : मित्र गुरुङ (उपहार)
सर्वोत्कृष्ट सहअभिनेता : प्रमोद अग्रहरी (अगस्त्य)
सर्वोत्कृष्ट सहअभिनेत्री : वर्षा शिवाकोटी (परदेशी २)
सर्वोत्कृष्ट संगीतकार : प्रकाश सपुत (बोक्सीको घर)
सर्वोत्कृष्ट गायक : एसडि योगी (नाङ्गो गाउँ)
सर्वोत्कृष्ट गायिका : समीक्षा अधिकारी (बोक्सीको घर)
जुरी अवार्ड : बोक्सीको घर
कृटिक्स अवार्ड : गाउँ आएको बाटो
प्रतिक्रिया लेख्नुहोस्:-