पोखरा, २८ मङ्सिर / संस्कृति, पर्यटन तथा नागरिक उड्डयनमन्त्री रवीन्द्र अधिकारीले पोखरा अन्तर्राष्ट्रिय विमानस्थल तोकिएको समयभन्दा छ महीना अघि निर्माण सम्पन्न हुने बताउनुभएको छ ।
जनकल्याण क्लबद्वारा पोखराको काहुँडाँडामा आयोजना गरिएको तेस्रो काहुँ धरहरा महोत्सवको आज उद्घाटन गर्दै उहाँले विमानस्थल निर्माण कार्य तीव्र गतिमा अघि बढेकाले सन् २०२१ को शुरुदेखिनै सञ्चालनमा आउने विश्वास व्यक्त गर्नुभयो ।
विमानस्थल निर्माण सम्पन्न भई सञ्चालनमा आएसँगै पर्यटनको विविधिकरण हुने उल्लेख गर्दै उहाँले सम्भाव्यता अध्ययन गरी आवश्यक भौतिक पूर्वाधार तयार गर्न व्यवसायीलाई आग्रह गर्नुभयो ।
एघार महीनाको अवधिमा हवाई जहाजबाट ११ लाख र सडक यातायातबाट १२ लाख गरी कूल २२ लाख पर्यटक नेपाल आएको तथ्याङ्क उल्लेख गर्दै उहाँले मुलुकले सन् २०२० सम्ममा लगभग २५ लाख र २०३० को अवधिमा ५० लाखभन्दा बढी पर्यटक भित्र्याउने आधार तयार भएको बताउनुभयो ।
मुलुकको आर्थिक विकास समृद्धिका लागि पर्यटन महत्वपूर्ण क्षेत्रको रहेको बताउँदै उहाँले अबको पर्यटन कृषकले उत्पादन गरेको वस्तुको मूल्य र बजारीकरणसहित रोजगार सिर्जना गर्ने खालको हुनुपर्नेमा जोड दिनुभयो । वर्तमान सरकार आर्थिक विकास र समृद्धिका लागि क्रियाशील रहेको बताउँदै मन्त्री अधिकारीले स्थानीय, प्रदेश र सङ्घीय सरकार जनताको सेवामा समर्पित रहेको उल्लेख गर्नुभयो ।
गण्डकी प्रदेशसभा सदस्य मीना गुरुङले पर्यटन प्रवद्र्धन प्रदेश सरकारको पहिलो प्राथमिकता रहेको उल्लेख गर्दै पर्यटनको विकास जनताको समृद्धिसँग जोडिने विश्वास व्यक्त गर्नुभयो । अर्का प्रदेशसभा सदस्य बिन्दु थापाले घरबासको माध्यमबाट शहर केन्द्रित पर्यटकलाई ग्रामीण क्षेत्रमा विस्तार गरी आर्थिक समृद्धिको आधार निर्माण गर्नुपर्ने बताउनुभयो ।
(रासस)
प्रतिक्रिया लेख्नुहोस्:-