धनगढी । धनगढी प्रिमियर लिग डिपिएलकाे तेस्राे संस्करण लागि २ सय ५ जना खेलाडीले नाम दर्ता गराएका छन् । डिपिएलकाे अायाेजक धनगढी क्रिकेट एकेडेमीका अध्यक्ष सुवाश शाहीद्वारा बुधवार जारी विज्ञप्तिमा नाम दर्ता गराएका सम्पूर्ण खेलाडीहरुको अक्सन आगामी शनिबार काठमाडौंमा हुने जनाइएकाे छ । डिपिएल माघ २६ देखि फागुन ११ गतेसम्म धनगढीमा हुदै छ ।
डिपिएलको प्रत्येक टोलीले एक ट्यालेन्ट हन्टबाट लिइएका र दुई विदेशी गरि १५ जना खेलाडीलाई टोलीमा अनुबन्ध गर्नुपर्नेछ । अक्सनका लागि खेलाडीको बोली न्यूनतम ३० हजारदेखि अधिकतम रु दुई लाख ५० हजारसम्म लाग्नेछ । प्रतियोगितामा कुल १९ खेल हुनेछन् । प्रतियोगिता टी–२० को आधारमा हुनेछ । लिग चरणमा प्रत्येक टिमले अरु टिमसँग एक–एक खेल खेल्ने छन् । शीर्ष चार टोली प्ले–अफमा पुग्नेछन् । त्यसमा पहिलो र दोस्रो हुने टिमको विजेता फाइनल पुग्नेछ ।
देशकै सर्वाधिक ठुलो धनराशीको क्रिकेट प्रतियोगिताको रुपमा २०७३ र २०७४ सालमा डीपीएलको पहिलो र दोस्रो संस्करण सम्पन्न गरिएको थियो । डीपीएल देशमै पहिलोपल्ट अक्सन गराउने प्रतियोगिता पनि हो । डीपीएलको पहिलो र दोस्रो संस्करणको विजेता टिम चौराह धनगढी हो । पहिलो संस्करणमा उसले विराटनगर किंग्स र दोस्रो संस्करणमा काठमाडौं गोल्डन्सलाई पराजित गर्दै उपाधि उचालेको थियो ।
पहिलो संस्करणको डीपीएलको बजेट १ करोड ८२ लाख थियो र कुल पुरस्कार २८ लाख ५० रुपैयाँ थियो । यस्तै दोस्रो संस्करण तीन करोडको लागतमा प्रतियोगिता सम्पन्न भएको थियो, जसमा विजेतालाई २५ लाखसहित कुल ५० लाख पुस्कार प्रदान गरिएको थियो ।
प्रतिक्रिया लेख्नुहोस्:-