एनआरएनए अमेरिकामा सदस्यता छानबिन समितिले काम थाल्यो

सानफ्रानसिस्को, जनवरी २७ /
निर्वाचन नजिकदै गर्दा सधैँ चर्चामा रहने सदस्यता सम्बन्धी विवाद हल गर्न एनआरएनए अमेरिकाले गठन गरेको सदस्यता छानबिन समितिले काम सुरु गरेको छ । समितिका संयोजक राम कुमार सुवेदीले दूरबिन नेपालसँग कुरा गर्दै भने “वेबसाइट भित्र गएर काम गर्न सक्ने सबै सुविधा प्राप्त भएपछि सदस्यलागि आवेदन दिएकाहरूको छानबिन सुरु गरेका छौ । सदस्यताको नवीकरण र नयाँ सदस्यताका लागि आवेदन दिएका मध्ये करिब एक सय जनाको भेरीफाई गरिसकियो ।”
संयोजक सुवेदीका अनुसार केही सदस्यहरूमा बाहेक धेरैमा कुनै समस्या देखिएको छैन । थोरै सदस्यहरूले फर्म भर्दा आइडी कार्डमा भएको भन्दा केही अक्षर, अङ्क र ठेगाना तल माथि भेटिएको छ । सुबेदीले भने “हामीले हेर्दा अर्पाटमेन्ट, सिटी र स्टेट छोडेर अर्को ठाउँमा सरेकाहरूको पुरानो ठेगाना र नयाँ ठेगाना मिलेको छैन । त्यसै अनुसार आइडी कार्डमा भएको ठेगाना र फर्म भर्दा राखेको ठेगाना मिलेको छैन । सदस्यता फर्ममा देखिएका यस्ता कमीकमजोरी फोन र इमेल मार्फत बुझेर मात्र एप्रुभ गरिरहेका छौ ।”
छानबिन समिति गठन हुनु अगाडि अध्यक्ष केशव पौडेले एप्रुभ गरेका सदस्यहरूलाई समेत समितिले छानबिनको दायरामा राखेको छ । सुवेदीले दूरबिन नेपालसँग भने “अध्यक्ष पौडेलले अव सदस्यता सम्बन्धमा कुनै काम गर्नु हुन्न । समितिका तीन जनाले भेरीफाई गरेर एप्रुभ गर्ने हो । समितिले पौडेलले यस अघि एप्रुभ गरेका सदस्य माथि पनि छानबिन गरिरहेको छ ।”
छानबिन समितिका संयोजक एनआरएन अमेरिकाका उपाध्यक्ष रामकुमार सुवेदी गत निर्वाचनमा डाक्टर केशव पौडेलको समूहबाट निर्वाचित भएका हुन् । समितिका अर्का सदस्य बाल जोशी एनआरएन आइसीसी उत्तर अमेरिका क्षेत्रीय संयोजक आरसी गौरी जोशीको जोडवल र सिफारिसमा एनआरएन अमेरिकाको मिडिया कोर्डिनेटरमा मनोनीत भएका हुन् । जनजाति समुदायका प्रतिभाशाली युवा मध्येका एक पवन योञ्जन समितिका अर्का सदस्य हुन् । सानै उमेरमा एनआरएन अमेरिकाको सह कोषाध्यक्षमा निर्वाचित पवन योञ्जन आइटीमा विशेष दख्खलता राख्छन् । सदस्यता छानबिन समितिका तीनै जनाले आगामी निर्वाचनमा प्रतिस्पर्धा नगर्ने बचनवद्धता जाहेर गरिसकेका छन् ।