डालसमा आजबाट भागवत महापुराण

आर्भिङ्ग ।
नेपालीहरूका घना बस्ती भएका अमेरिकाका ठुला सहरहरूमा धर्म,संस्कार संस्कृति जगेर्ना, प्रवर्धन र साथ सहयोग जुटाउन विभिन्न कार्यक्रमहरू भइरहेका हुन्छन् । नेपालीहरूको आफ्नै मेहनत र पसिनाबाट टेक्ससको आर्भिङ्गमा निर्मित आस्थाको केन्द्र पशुपतिनाथ तथा बुद्ध मन्दिरमा आज अर्थात् आइतबारबाट श्रीमद्भागवत महापुराणको सुरु हुँदै छ । निर्धारित कार्यक्रम अनुसार बिहान ११ बजे कलश यात्रा प्रारम्भ हुन्छ । महापुराण आयोजक पृथ्वी नारायण शाह स्मृति तथा सांस्कृतिक प्रतिष्ठानले सार्वजनिक गरेको तालिकामा जून ३ तारिख देखि ९ तारिखसम्म कथा वाचन हुने उल्लेख छ । महापुराणको धार्मिक कर्म विधिवत ढङ्गले अगाडि बढ्दा आवश्यक शुल्क र दान दक्षिणा दिएर कर्ता, सहायक कर्ता बन्न सक्नु हुने छ । त्यस्तै यस अवधिमा आफ्ना छोरा नातिको व्रतबन्धको कार्यक्रम राख्ने इच्छुक परिवारले पनि आयोजकसँग समन्वय गरेर कर्म गराउन अवसर खुला गरिएको छ ।

महापुराण आयोजक समिति सदस्य विनोद कुमार तिवारीका अनुसार खर्च कटाएर जोगिएको सङ्कलित सहयोग डालस स्थित नेपाली सांस्कृतिक तथा आध्यात्मिक केन्द्र (एनसीएससी) लाई प्रदान गरिने छ । एनसीएससीले प्रवासी नेपालीहरूमा रहेको धर्म ,संस्कार, संस्कृति प्रतिको लगाव, भावना आस्थालाई एक ठाउँमा ल्याउन काम गरिरहेको छ । एनसीएससीको स्थापनासँगै डालस क्षेत्रमा नेपालीहरूका धार्मिक, संस्कृति गतिविधि बढेको सबैले महसुस गरेका छन् । यसैको सहयोगार्थ र निरन्तरता पनि हो भागवत महापुराण ।