न्युयोर्कमा गाईजात्रा महोत्सव हुने

न्युयोर्क, दूरबिन नेपाल, अगष्ट चार
यसबर्ष गाईजात्राको अवसर पारेर अमेरिकाको न्युयोर्कमा पहिलो पटक गाईजात्रा तथा हास्यव्यंग महोत्सव आयोजना हुने भएको छ । अमेरिकामा सञ्चालित टुटुल्को डटकमको आयोजनामा हुन गइरहेको गाईजात्रा महोत्सवमा अमेरिकामा उपलव्ध विभिन्न कलाकारहरुले आकर्षक प्रस्तुति दिने टुटुल्को डटकमका प्रधान सम्पादक तथा कार्यक्रम संयोजक ज्योतिकुमार श्रेष्ठले जानकारी दिए । आइतबार न्युयोर्कको ज्याक्सन हाइट्समा आयोजित पत्रकार सम्मेलनमा कार्यक्रमको उद्धेश्य नेपाली संस्कृतिको प्रवर्धनमात्र नभएर अमेरिकाभित्र रहेका नेपाली कलाकारहरुको प्रतिभा प्रष्फुटन गराउने अवसरको रुपमा गाईजात्रा महोत्सव फलदायी हुने आयोजकले बताए ।

अगष्ट १७ गते नर्दन ब्लुबर्ड स्थित क्वीन्स लाइब्रेरीमा हुने गाईजात्रा तथा हास्यव्यंग महोत्सव दिउसो ठिक दुई बजे शुरु भई अपरान्ह चार बजे सकिने बताइएको छ । गाईजात्रा तथा हास्यव्यंग महोत्सवमा भर्जिनिया, कनेक्टीकट लगायत अमेरिकाका विभिन्न स्थानका कलाकारहरुलेपनि आफ्नो प्रस्तुती दिनेछन । महोत्सवमा प्रहसन, व्यंग, प्यारोडी र नृत्य देखाइनेछ । त्यस्तै गाईजात्राको झांकीपनि कार्यक्रमको मुख्य आकर्षण हुने आयोजकले दावी गरेका छन । कार्यक्रमको तयारी निकै उत्साहपुर्वक भइरहेको र अधिकांश टिकट विक्री भइसकेको कार्यक्रम संयोजक श्रेष्ठले बताए । परापुर्व कालदेखि नेपालमा चल्दै आएको गाईजात्रा पर्वलाई प्रवासमा पनि विस्तार गरी नेपाली संस्कृतिको जगेर्ना गर्न महोत्सव सार्थक हुने विस्वास पत्रकार सम्मेलनका सहभागीहरुले गरेका छन ।

समाजका विक्रिती विसंगतिहरुलाई व्यंगात्मक रुपमा प्रस्तुत गर्ने उद्धेश्यले २०४० सालमा नेपालको धरानमा स्थापित टुटुल्को मासिक चार बर्षदेखि अनलाइनको रुपमा अमेरिकामापनि सक्रिय हुंदै आएकोछ । मल्लकालमा उपत्यकाका प्रभावशाली राजा प्रताप मल्लले पुत्र वियोगले अशान्त रहेकी आफ्नी रानीलाई चित्त बुझाउन गाईजात्रा पर्वको शुरुवात गरेको इतिहासमा उल्लेख छ । गाइजात्रामा सोही बर्ष मृत्यु हुनेहरुका परिवारका सदस्यहरुले मृतकको आत्माको शान्तिको कामना गर्दै जात्रा निकाल्ने चलन छ ।