काठमाडौ । आज भएको खेलमा नेपाल क्यानडासँग पराजित भएको छ ।
मुलपानी क्रिकेट मैदानमा नेपालले प्रस्तुत गरेको १ सय ८२ रनको लक्ष्य क्यानडाले ३९ औं ओभरमा ६ विकेट गुमाएर पूरा गरेको छ। क्यानडाका लागि निकोलस किर्तनले अर्धशतक बनाए। किर्तनले ७९ बलमा ६ चौकासहित ५८ रनको योगदान दिए।
यससँगै क्यानडाले ३ खेलको सिरिज २(१ ले आफ्नो पक्षमा पारेको हो। क्यानडाले पहिलो खेल ४ विकेटले जितेको थियो। दोस्रो खेलमा नेपाल २ विकेटले विजयी भएको थियो।
क्यानडाका लागि ओपनर आरोन जोन्सनले आक्रामक सुरुवात दिलाएका थिए। उनले ३१ बलमा २ चौका र ४ छक्कासहित ४२ रन जोडे। अर्का ओपनर सृमन्थ विजयरत्ने ११ बलमा १० रन जोड्दै पाँचौ ओभरमा पेभेलियन फर्केका थिए।
नवौं ओभरमा जोन्सन आउट हुँदा टोलीको स्कोर ५८ रन थियो। दुवै साहब आलमको बलमा विकेटकिपर अर्जुन कुमालबाट स्टम्पिङ आउट भएका थिए।
दिलप्रित बज्वा ११ रन र हर्ष ठाकर २ रनमा आउट हुँदा क्यानडा केहि समस्यामा परेको थियो। तर अर्को एण्डमा निकलस किर्तनले इनिङ सम्हाले। निखिल दत्त ३५ बलमा १४ रन जोड्दै आउट भए।
त्यसपछि नवनित धलिवल र किर्तनले बलियो साझेदारी गर्दै जितनजिक पुर्याए। छैटौं विकेटका लागि यी दुईले ६७ रनको साझेदारी गरे। धलिवल ४३ बलमा ४ चौकासहित ३२ रन जोड्दै आउट भए। नेपालका लागि साहब आलमले ४ तथा शेर मल्ल र बसिर अहमदले १(१ विकेट लिए।
प्रतिक्रिया लेख्नुहोस्:-