इलाम । स्वास्थ क्षेत्रमा सुधारका लागि विगत लामाे समय देखि पटक पटक सत्याग्रह गर्दै अाएका डाक्टर गोविन्द केसीले अाफ्नाे १६ औं चरणाकाे अामरण अनसन पुस २५ गते सम्मका लागि स्थगित गरेका छन् । १५ औं चरणकाे अनसन ताेडाउदा गरिएका सहमति कार्यन्वयन नभएकाे र चिकित्सा शिक्षा विधेयक सम्झाैता अनुसार नल्याइएकाे भन्दै डा केसी १६ औं चरणाकाे अनसन बस्न भन्दै इलाम पुगेका थिए । उनले पुस १७ गते बाट अनसन शुरू गर्ने बताएका थिए ।
इलाममा बुधवार पत्रकार सम्मेलन गर्दै डा केसीले ‘संसदको शिक्षा तथा स्वास्थ्य समितिकी सभापतिका तर्फबाट हामीसित भएको सम्झौता अनुसार ऐन जारी गर्ने प्रतिबद्धता गर्दै त्यसका लागि केही दिनको समय माग भएकाले’ अनशनको मिति सारेको जनाए ।
उनले १५ औं सत्याग्रहका बेला संसदमा विचाराधीन चिकित्सा शिक्षा विधेयकमा निश्चित संशोधनहरुसहित पारित गर्ने, उपत्यकाबाहिर विभिन्न ठाउँहरुमा सरकारी मेडिकल कलेज खोल्ने लगायतका बुँदाहरुमा सम्झौता भएको स्मरण गराउँदै चिकित्सा शिक्षा विधेयक अघि बढाउने क्रममा संसदीय समितिमा चलखेल भइरहेको जनाएका छन्।
डा केसीले अध्यादेशका जनतामुखी र विद्यार्थीमुखी प्रावधानहरु काटेर विधेयक संसदमा पेश गरेका शिक्षा मन्त्रीका कारण सम्झौता अनुसार विधेयक पारित हुन नसकेको जनाए।
प्रतिक्रिया लेख्नुहोस्:-