रेशम चाैधरीलाई थुनामुक्त गर्न सर्वाेच्चद्वारा अस्वीकार

काठमाडाै । संसदकाे लाेगाे लगाएर पनि रेशम चाैधरी अझै कारागारमा नै रहने भएका छन् । सर्वोच्च अदालतले टीकापुर घटनाका आरोपमा थुनामा रहेका चाैधरीलाई थुनामुक्त गर्न अस्वीकार गरकाे छ ।

२०७२ भदाैमा थारू आन्दोलनका क्रममा कैलालीको टीकापुरमा प्रहरीका एसएसपी लक्ष्मण न्यौपानेसहित आठ जना प्रहरी र एक जना बालक मारिएका थिए। साेही घटनाका मुख्य मतियारकाे आराेप लागेका चाैधरी लामाे समय भुमिगत बसे । भुमिगत रूपमै गत बर्ष संघीय संसदकाे निर्वाचानमा कैलाली १ बाट विजयी भएका चाैधरीले पछि आत्मसमर्पण गरेका थिए ।

थुनामा रदाकै अवस्थामा गत साता सभामुख कृष्ण बहादुर महराले चाैधरीलाई सांसद पद तथा गाेपनियताकाे सपथ खुवाएका थिए । जेलबाट प्रहरीकाे भ्यायनमा आई सपथ लिएर पुन जेल फर्किएका चाैधरीले थुनामुक्त हुनु पर्ने भन्दै अपिल गरेका थिए ।

न्यायाधीश ईश्वरप्रसाद खतिवडा र पुरुषोत्तम भण्डारीको संयुक्त इजलासले सोमबार चौधरीलाई थुनामुक्त गर्न अस्वीकार गरेको हो। कर्तव्य ज्यान मुद्दामा कैलाली जिल्ला अदालत र उच्च अदालत दिपायलको आदेशलाई सर्वोच्च अदालतले सदर गरेको छ।

आदेशमा भनिएको छ, ‘चौधरीले आरोपित कसुर गरेको भनी विश्वास गर्न सकिने पर्याप्त र मनासिब आधार विद्यमान रहेको देखिँदा निजलाई पछि ठहरे बमोजिम हुने गरी मुद्दा पुर्पक्षका लागि थुनामा राख्ने गरी उच्च अदालत दिपायल र जिल्ला अदालत कैलालीको आदेश मनासिब देखिन्छ।’

जिल्ला अदालतको २०७४ फागुन १४ गतेको आदेश विरुद्ध चौधरीले उच्च अदालत दिपायलमा मुद्दा दायर गरेका थिए। सो अदालतको विसं २०७४ चैत २२ गतेको आदेश विरुद्ध २०७५ असार ५ गते सर्वोच्च अदालतमा उनी गएका थिए।

अदालतको सुनुवाइबाट सांसद चौधरीलाई साधारण वा धरौटी तरिकमा रिहा गर्न आदेश दिएको खण्डमा उनी व्यवस्थापिका संसद छिर्न पाउने थिए।