कास्की । पोखरामा जारी छैठौँ संस्करणको मनकामना केबलकार पोखरा कप अन्तर्राष्ट्रिय फुटबलमा पाहुना टोली डफिन्स टिम फेमेली क्यामरुन क्वाटरफाइनलमा प्रवेश गरेको छ ।
जिल्ला फुटबल सङ्घको आयोजनामा यही माघ १५ गतेदेखि शुरु प्रतियोगिताअन्तर्गत आज भएको खेलमा डफिन्सले च्यासल युथ क्लबलाई १–० गोलअन्तरले पराजित गरी अन्तिम आठमा प्रवेश गरेको होे । खेलको १०औँ मिनेटमा डफिन्सका यानिकले गरेको गोल नै टिमलाई जिताउन पर्याप्त रह्यो । करीब ३० यार्डबाट इकविनले हानेको फ्रिकिकलाई यानिकले हेड गर्दै बललाई पोष्टको दिशा दिएका थिए ।
सुदूरपश्चिमको खप्तड गोल्डकप र इटहरीमा जारीे मदन भण्डारी मेमोरियल गोल्डकपमा पहिलो खेलबाटै बाहिरिएको डफिन्स पोखरामा भने पहिलो खेलमा जित निकाल्न सफल भएको छ ।
प्रतियोगिताको विजेता टिमले रु सात लाख ५५ हजार, शिल्ड, मेडल र प्रमाणपत्र प्राप्त गर्नेछ । त्यस्तै उपविजेताले रु चार लाख पाँच हजार ५५५, मेडल र प्रमाणपत्र पाउनेछ । सर्वोत्कृष्ट खेलाडीलाई एक थान मोटरसाइकल तथा विधागतरुपमा उत्कृष्ट डिफेन्स, फरवार्ड, गोलकिपर, मिडफिल्डर र प्रशिक्षकलाई जनही रु २५ हजार पुरस्कार प्रदान गरिनेछ । बिहीबारको खेल आयोजक पोखरा–११ र ब्रिगेड ब्वाइजकाबीच हुने आयोजकले जनाएको छ ।
रासस
फाेटाे गाेल नेपाल डट कम
प्रतिक्रिया लेख्नुहोस्:-