अबुधाबी । अरब मुस्लिम राष्ट्र युनाइटेड अरब इमिरेट्सको अबुधाबी रङ्गशालामा मङ्गलबार पोप फ्रान्सिस पहिलोपटक सार्वजनिक कार्यक्रममा उपस्थित हुनुभएको छ । रङ्गशाला भित्र र बाहिर गरी करिब एक लाख ७० हजार क्याथोलिक धर्मावलम्बी भेला हुने अपेक्षा गरिएको छ ।
जायाद स्पोर्ट्स सीटी रङ्गशालामा प्रवेश गर्नुहुँदा पोप फ्रान्सिसलाई त्यहाँ उपस्थित ठूलो जनसमूहले भ्याटिकनका झण्डा र ब्यानरले स्वागत गरेका थिए । उहाँ रङ्गशालामा प्रवेश गर्दा मोटरमा सवार हुनुहुन्थ्यो ।
युनाइटेड अरब इमिरेट्सको छिमेकी मुलुक साउदी अरेबिया हो । साउदी अरेबिया इस्लाम धर्मको जन्मस्थल पनि हो । तर ठूलो छिमेकी मुलुक साउदीमा गैर–मुस्लिमलाई सार्वजनिक स्थलमा प्रार्थना गर्न समेत प्रतिबन्धित गरिएको छ । अबुधाबीमा भने इसाई समुदायका व्यक्तिलाई प्रार्थना गर्न छुट दिइएको छ । सबै धर्मप्रति युएई उदार मानिएको छ ।
फ्रान्सिसले मङ्गलबार नै युएईको तीनदिने भ्रमण पनि समाप्त गर्दै हुनुहुन्छ । पोपमा नियुक्त भएसँगै पोप फ्रान्सिसले इसाई धर्मका कट्टर विरोधी मुस्लिम विश्वमा समेत भाइचारा सम्बन्ध विस्तार गर्नुभएको छ ।
रङ्गशालामा करिब ५० हजार क्याथोलिक समुदायका व्यक्तिहरुले पोप फ्रान्सिसलाई स्वागत गरेका थिए । उक्त समारोहमा केही यमनका इसाई धर्मावलम्बी पनि सहभागी थिए ।
झण्डै एक लाख २० हजार अरु रङ्गशाला बाहिर भेला भएका थिए । उनीहरुले भिडियो सेवाबाट रङ्गशाला भित्रका गतिविधि हेरेका थिए ।
युएईले “सहिष्णुता वर्ष २०१९” को अवसर पारेर पोप फ्रान्सिसलाई आफ्नो मुलुकको भ्रमणमा निम्त्याएको हो । सहिष्णुता मन्त्री शेख नाहयान बीन मुबारकले पोप फ्रान्सिस रङ्गशालामा प्रवेश गर्नुअघि उपस्थित धर्मावलम्बीलाई स्वागत गर्नुभएको थियो ।
पोप फ्रान्सिसको भ्रमणलाई फिलिपिनी र भारतीय समेत युएईमा रहेका आप्रवासी क्याथोलिक समुदायले स्वागत गरेका छन् ।
(रासस/एएफपी)
तस्वीर एपी
प्रतिक्रिया लेख्नुहोस्:-