ह्युस्टन, टेक्सस, एप्रिल १८
पूर्व अमेरिकी प्रथम महिला बारबरा बुशको ९२ बर्षको उमेरमा टेक्ससको ह्युस्टनमा हिजो साँझ निधन भएको छ। ४१ औं अमेरिकी राष्ट्रपति जर्ज हर्बट वाकर बुशकी पत्नी एवं ४३ औं अमेरिकी राष्ट्रपति जर्ज डब्ल्यू बुशकी आमा श्रीमती बुश निकै शालिन प्रथम महिलाको रुपमा चिनिन्थिन्।
१९८९ देखि १९९३ सम्म प्रथम महिला तथा १९८१ देखि १९८९ सम्म उपराष्ट्रपति बुशकी श्रीमतीका रुपमा द्वीतीय महिलाको हैसियतमा रहेकी बारबरा बुशले प्रथम महिला भएपछि पारीवारिक साक्षरता बृद्दीका लागि ‘बारबरा बुश फाउण्डेशन’ नै खोलेर सामाजिक अभियानमा संलग्न भएकी थिइन्।
रिपव्लिकन पार्टीकी निकै चर्चित नेतृ समेत रहेकी बुश रिपव्लिकनहरुको निकै पकड रहेको टेक्ससको ह्युस्टनमा आफ्नै घरमा ‘कम्फर्ट केयर’ लिइरहेकै अवस्थामा श्रीमती बुशको मृत्यु भएको थियो। उनको मृत्युमा उनको पति राष्ट्रपति जर्ज एच डब्ल्यू बुश तथा उनका छोरा राष्ट्रपति जर्ज बुश, राष्ट्रपति विल क्लिन्टन सहित कैयनले ट्वीटर मार्फत शोक जनाएकाछन्। राष्ट्रपति बुशले आफ्नी श्रीमती बारबरा संसारमै सबभन्दा प्रिय महिला रहेकी र उनी स्वर्गमा गएकी छिन् भनेका छन्। उनका अर्का छोरा फ्लोरिडाका ४३ औं गभर्नर एवं गत राष्ट्रपतीय चुनावका बेला रिपव्लिकन पार्टीको तर्फबाट उम्मेदवारको दौडमा रहेका जेव बुशले बारबरा बुशको छोरा हुन पाएकोमा निकै गर्व लागेको भनेका छन्।
यही शनिवार ह्युस्टन स्थित सिटीहलमा श्रीमती बुश प्रति सार्वजनिक सम्मान एवं श्रद्दान्जली अर्पण गर्ने कार्यक्रम रहेको स्थानीय संचार माध्यमहरुले जनाएका छन्। आगामी शनिवार हुने दिवंगत श्रीमती बुशको अन्तिम संस्कारमा सहभागी हुन पूर्व राष्ट्रपतिहरु तथा बरिष्ठ अमेरिकी राजनीतिज्ञ एवं अधिकारीहरु ह्युस्टन आउने बताइएको छ। यसैबीच प्रथम महिला मेलानिया ट्रम्प एवं राष्ट्रपति ट्रम्पकी छोरी इभांका ट्रम्प समेत अन्तिम श्रद्धान्जलीका लागि ह्युस्टन आउने कार्यक्रम रहेको समाचारहरुमा जनाइएको छ।
तस्वीर: गेटी इमेज, विकीपेडिया तथा एविसी१३ ह्युस्टन
प्रतिक्रिया लेख्नुहोस्:-