काठमाडौं । प्रधानसेनापति प्रभुराम शर्माले शान्ति सेनामा सहभागिता नेपालको परराष्ट्र नीतिको एक महत्वपूर्ण पक्ष भएको बताएका छन् । उनले शुक्रबार पाँचखालस्थित वीरेन्द्र शान्ति कार्य तालिम केन्द्रमा ७५ औं ‘इन्टरनेशनल डे अफ यूएन पिसकिपर्स–२०२३’ अवसरमा यस्तो बताएका हुन् ।
प्रधानसेनापति शर्माले नेपाली शान्ति सैनिकहरु तथा शान्ति स्थापना कार्यमा संलग्न नेपाल प्रहरी एवं सशस्त्र प्रहरी बल नेपालका सकलदर्जाहरु संयुक्त राष्ट्रसंघको वडापत्रमा उल्लेखित लक्ष्य र उद्देश्यहरु पूरा गर्न दृढ रहेको उल्लेख गरे ।
उनले नेपाल संयुक्त राष्ट्रसंघको एक विश्वसनीय सदस्यको रुपमा रहेको बताए । शर्माले विश्व शान्ति स्थापनार्थ विश्वसनीय र पेसेवर सेनाको योगदान पुर्याउने राष्ट्रहरुमध्ये नेपाल अग्रपंक्तिमा रहेको बताए । ‘विश्व शान्ति स्थापनार्थ आफ्नो ज्यानको आहुति दिने वीर सैनिकहरुप्रति श्रद्धाञ्जली अर्पण गर्नछु । उहाँहरुले पुर्याएको योगदानको संयुक्त राष्ट्रसंघ, राष्ट्र र नेपाली सेनाले सदैव सम्मान र कदर गर्ने गर्दछ,’ उनले भने ।
प्रतिक्रिया लेख्नुहोस्:-