काठमाडौं । लमजुङको मध्य नेपाल नगरपालिका–७ स्थित मध्यपहाडी लोकमार्गमा टिपर दुर्घटना हुँदा ४ जनाको घटनास्थलमै मृत्यु भएको छ।
मृत्यु हुनेमा टिपरचालक धादिङको गजुरी गाउँपालिका–६ घर भएका अन्दाजी २७ वर्षका आकाश भनिने विनोद घिमिरे, गोरखाका गोरखा नगरपालिका–१२ का २३ वर्षीय रविन्द्र सेढाई, तनहुँको व्यास नगरपालिका(६ कलेष्टीका ४५ वर्षीय उत्तम न्यौपाने र सल्यान कुमाख गाउँपालिकाका २१ वर्षका पारश शाह रहेका जिल्ला प्रहरी कार्यालय लमजुङका इन्सपेक्टर जगदीश रेग्मीले जानकारी दिए।
उनका अनुसार दुर्घटनामा मृत्यु हुने सबैजना मध्यपहाडी लोकमार्ग निर्माणमा खटिएका चालक तथा कामदार हुन्। उनका अनुसार मध्य नेपालकै कल्याङबेंसीबाट रामबजारतर्फ आउने क्रममा ढुंगा लोड भएको बा४ख ७७८१ नम्बरको टिपर आइतबार दिउँसो करिब सवा ३ बजे दुर्घटनामा परेको हो। टिपर मध्यपहाडी लोकमार्गबाट करिब ३० मिटर तल खेतमा खसेको थियो।
प्रतिक्रिया लेख्नुहोस्:-