अमेरिका/मे ३१, २०१८
गत मार्च महिनामा राष्ट्रपतिद्वारा आयातित स्टिल र एलुमिनममा क्रमश २५ र १० प्रतिशत कर लगाउने घोषणा गरेका थिए। उनको शुरुको घोषणाबाट चिडिएका यूरोपियन मित्रशक्तिहरु र उतर-अमेरिकी व्यापार साझेदार क्यानडा र मेक्सिकोबाट आयात हुने स्टील र एलुमिनममा भने त्यस्तो कर तत्काल नलगाउने घोषणा गरेको अमेरिकाले दुई महिना देखि जारी लगातारको व्यापार-वार्तामा आशा गरिएजस्तो प्रगति नभएकोले कर स्थगनको नीति हाललाई कायम नराखिने जनाएको हो। घोषित कर आज मध्यरातबाट नै लागू हुनेछ। यूरोपियन व्यापारिक साझेदारहरुसंग पेरिसमा जारी वार्ताबाट सकारात्मक परिणाम आउन नसकेको भन्दै पेरिसमा रहेकै बेला अमेरिकी वाणिज्यमन्त्री विल्भर रसले स्टील र एलुमिनम आयातमा अन्य मूलुकहरुको लागि लगाइएको २५ र १० प्रतिशतको करको दर क्यानडा, मेक्सिको र यूरोपियन यूनियनका लागि समेत लागू गर्ने निर्णय गरिएको बताएका छन्। अमेरिकाको यो घोषणाप्रति यूरोपियन यूनियन सहित फ्रान्स, बेलायत, मेक्सिको र क्यानडाले आपत्ति जनाएका छन् र अमेरिकी घोषणाको जवाफ आफूहरुले पनि उचितरुपमा दिने बताएका छन्। अमेरिकाको पछिल्लो घोषणाबाट उसका नजिकका मित्रशक्ति राष्ट्रहरुलाई फेरि चिढ्याएको छ र यसले अमेरिकाको बाह्य ब्यापारमा ठूलो दबाव सृजना गर्ने निश्चित छ।
रिपव्लिकन नेताहरु समेत सहमत हुन नसकेको ट्रम्पको स्टील र एलुमिनममा लगाइने कर योजनाबाट अमेरिकी व्यापार र अन्तराष्ट्रिय सम्वन्धहरुमा आउने उतार-चढावको समेत वास्ता नगरेको ट्रम्प प्रशासन ‘अमेरिका पहिले’ नीतिमा निकै अडिग रहेको देखिन्छ।
पछिल्लो अमेरिकी कदम राष्ट्रपति ट्रम्पको ‘अमेरिका पहिले’ नीतिको निरन्तरता कै रुपमा आएको हो। “हामी हाम्रो पानीजहाज, हवाईजहाज तथा मिलिटरी इक्विपमण्ट अमेरिकी स्टिल र एलुमिनमबाटै बनाउन चाहन्छौं।” गत मार्चमा आयातित स्टील र एलुमिनममा कर लगाउने घोषणा गर्दा राष्ट्रपति ट्रम्पले भनेका थिए। उनले जोड दिएर भनेका थिए “हामी हाम्रा बन्द भएका उद्योगहरुलाई पून संचालन गर्न चाहन्छौं भने बाहिरिएका उद्योगहरुलाई फेरि अमेरिकामा फिर्ता ल्याउन चाहन्छौं।”
“अमेरिकी उत्पादन किन्न प्रोत्साहन गर्ने र अमेरिकी जनताको हित हेर्ने मेरो सबभन्दा महत्वपूर्ण काम हो, जुन म गरिरहेछु।” यो कर नीति अमेरिकाको लागि सहज होइन तर अमेरिकी हितका लागि यो जरुरी भएको बताउने ट्रम्प प्रशासनको पछिल्लो कदमको भने सीमा जोडिएका मित्रराष्ट्रहरु क्यानडा र मेक्सिकोले समेत निकै आलोचना गरेका छन्।
तस्वीर: रोयटर्स
प्रतिक्रिया लेख्नुहोस्:-