काठमाडौं । प्रतिनिधिसभाका सभामुख देवराज घिमिरेले नयाँ संसद् भवनको काम निर्धारित समयभित्रै सम्पन्न गर्न निर्देशन दिएका छन्। सभामुख घिमिरेले बिहीबार सिंहदरबारस्थित निर्माणाधीन संसद् भवनको निरीक्षण गर्र्दै यस्तो निर्देशन दिएका हुन्।

अहिले ठेक्का प्राप्त समयको हिसाबले काम कम भएको उनको भनाइ छ। अबका दिनमा कामले गति लिने विश्वास व्यक्त गर्दै उनले विगतका प्रतिकूलतालाई अनुकूलतामा बदलेर तोकिएको समयभित्रै काम सम्पन्न गर्नुपर्नेमा जोड दिए।

‘समयको हिसाबले काम कम छ। तर अब यसले गति लिन्छ, सबै लाग्नुपर्छ, बन्नुपर्छ समयमा नै। यो राष्ट्रको आवश्यकता हो। हिजोका प्रतिकूलतालाई अब अनुकूलतामा बदलेर समयमा नै काम सक्नुपर्छ। अब अनुकूलता सबै ठाउँमा छ। यसैले अब समयमा नै काम सकिन्छ,’ सभामुख घिमिरेले भने।