नेपालको आफ्नै विकास मोडेल हुनुपर्ने प्रचण्डको धारणा

काठमाडौं । नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल प्रचण्डले नेपालको विकासको मोडेल नेपालकै जस्तो हुनुपर्ने बताएका छन्।
उनले काठमाडौंमा सोमबार आयोजित कलाकार सम्मान तथा पुरस्कार वितरण कार्यक्रमलाई सम्बोधन गर्दै भने, ‘नेपालको विकासको मोडेल नेपालको जस्तै हुनुपर्दछ। विगतमा कतिपयले सिंगापुरजस्तो, स्विट्जरल्यान्डजस्तो, जापानजस्तो इत्यादि पनि भन्यौँ । तर, अहिले सबैतिरको स्थिति हेर्दा नेपालको विकास नेपाली मोडेलकै हुनुपर्दछ।’

नेपालको इतिहास, भूगोल, संस्कृति, जातीय बनोटअनुकूल नेपाली मोडेलको विकास गरिनुपर्नेमा अध्यक्ष प्रचण्डको जोड छ। त्यसका लागि उत्पादन वृद्धि, आत्मनिर्भर अर्थतन्त्रको जग निर्माण, आयात प्रतिस्थापन र निर्यात प्रवर्द्धनजस्ता कार्यलाई प्राथमिकता दिनुपर्ने उनले औँल्याएका छन्।