शिव नेपाल
काठमाडौं । तनाव र विवादपूर्ण स्थितिबाट गुज्रिएको गैरआवासीय नेपाली संघ (एनआरएनए)को नवौं विश्व सम्मेलनको मतदान शुरु भएको छ । नेपाली समयअनुसार विहान १०ः०० बजेबाट शुरु भएको मतदान यो समाचार तयार पारुन्जेलसम्म जारी रहेको छ ।
निर्वाचन समितिले तयार पारेको सूची बमोजिम हिजो बुधबार हुनुपर्ने निर्वाचन उम्मेदवारबीच भएको आपसी तनाव र भोटर लिष्टमा समाविष्ट नामावलीको कारण रोकिएको थियो । निर्वाचन आयोगले विद्युतीय मतदान प्रकृयामा कठिनाई आएको वताए पनि मतदाता नामावलीलाई लिएर अध्यक्ष पदका प्रत्यासी कुमार पन्त र कुल आचार्य समूहबीच तनावपूर्ण स्थिति सृजना भएको थियो ।
इजरायलबाट प्रतिनिधि भएकी एक महिलाले आफू राती १२ बजेसम्म भोट खसाल्ने प्रतिक्षामा बसेको भएपनि दुई समूह वीच तनावपूर्ण स्थिति देखेको बताइन् । आज विहीबार मतदान शुरु भएपछि सयौं मतदाताहरु निर्वाचनमा सहभागी भएका छन् । दुई समूहबीच हिजो भएको तनावपूर्ण स्थितिको कारण आजको मतदानमा उल्लेख्य रुपमा प्रहरी परिचालन गरिएको छ ।
निर्वाचनमा ४२ पदका लागि ७६ जना प्रतिस्पर्धी छन् । नयाँ नेतृत्वका लागि अध्यक्षमा कुमार पन्त र कूल आचार्यबीच प्रतिस्पर्धा भइरहेको छ ।
निर्वाचनमा दुई हजार ५०० मतदाता रहेका छन् । ‘म, मेरो एनआरएन र मेरो नेपाल’ भन्ने मूल नाराका साथ मङ्गलबारदेखि शुरु भएको सङ्घको नवौँ नेपाली विश्व सम्मेलन तथा अन्तरराष्ट्रिय महाधिवेशनको प्रधानमन्त्री केपी शर्मा ओलीले बेलुका समापन गर्ने कार्यक्रम रहेको छ । सम्मेलनमा ८१ मुलुकका गैरआवासीय नेपाली सहभागी छन् ।
प्रतिक्रिया लेख्नुहोस्:-