युएईविरुद्धको एकदिवसीय सिरिजमा नेपालको जित

काठमाडौं । युनाइटेड अरब इमिरेट्सविरुद्धको तीन खेलको एकदिवसीय अन्तर्राष्ट्रिय क्रिकेट नेपालले २(१ ले जितेको छ । शुक्रबार त्रिवि क्रिकेट मैदानमा भएको तेस्रो तथा अन्तिम खेल नेपालले ६ विकेटले जितेर सिरिजमाथि कब्जा जमाएको हो ।

तेस्रो खेल जित्न नेपालले १ सय ७७ रनको लक्ष्य ४ विकेट गुमाएर ४० ओभर १ बलमा पुरा गरेको हो । नेपाललाई जित दिलाउन आशिफ शेखले सर्वाधिक ८५ रनको योगदान गरे । ज्ञानेन्द्र मल्लले ६४ रन जोडे । एकदिवसीयमा ज्ञानेन्द्रको यो सर्वाधिक रन हो । यसअघि उनले सर्वाधिक ५६ रन जोडेका थिए ।

आशिफ र ज्ञानेन्द्रले दोस्रो विकेटका लागि १ सय २२ रनको साझेदारी गरे । एकदिवसीयमा नेपालका लागि दोस्रो विकेटका लागि सर्वाधिक रनको साझेदारी हो । त्यसैगरी समग्रमा दोस्रो सर्वाधिक रनको साझेदारी समेत हो । एकदिवसीयमा सर्वाधिक १ सय २९ रनको साझेदारी रहेको छ ।