काठमाडौं । अबदेखि काठमाडौं जिल्लामा मध्यराति १२ बजेसम्म रेस्टुरेन्ट सञ्चालन गर्न पाइने भएको छ। जिल्ला सुरक्षा समितिको मंगलबार बसेको बैठकले रात्रिकालीन व्यवसाय सञ्चालनको समय अवधिसम्बन्धी नयाँ निर्णय गरेको हो।
निर्णयअनुसार मदिरा पसलहरू राति १० बजेसम्म, रेस्टुरेन्टहरू राति १२ बजेसम्म, डान्स बार, दोहोरी रेस्टुरेन्ट र लाउन्ज बार बिहान २ बजेसम्म र डिस्को तथा क्लब बिहान ४ बजेसम्म सञ्चालन गर्न पाइनेछ।
रात्रिकालीन व्यवसायलाई थप व्यवस्थित गर्ने उद्देश्यले यो निर्णय गरिएको काठमाडौंका प्रमुख जिल्ला अधिकारी घनश्याम उपाध्यायले बताए। ‘रात्रिकालीन व्यवसायलाई सुव्यवस्थित गराउन हामीले सञ्चालन गर्न पाउने समयबारे प्रस्ट निर्णय गरेका हौैँ,’ उनले भने, ‘यसबाट काठमाडौंमा पर्यटकीय तथा आर्थिक गतिविधिलाई वृद्धि गरी रोजगारी र आय आर्जन बढ्ने हाम्रो अपेक्षा छ।’
यो नियम काठमाडौंका सबै ठाउँमा लागू हुने सिडिओ उपाध्यायको भनाइ छ।
प्रतिक्रिया लेख्नुहोस्:-