कञ्चनपुर, १० पुस : गृहनगर पुगेका नेपाल आइडल सिजन–२ का विजेता रवि ओडको जिल्लाका बिभिन्न ठाउँमा आज भव्य स्वागत गरिएको छ ।
विजेता बनेर पुगेका ओडलाई स्थानीय प्रशंसकले बाजागाजासहित काँधमा उठाएर शुक्लाफाँटा नगरपालिकाको झलारीमा परिक्रमा गराएका थिए । नगरपालिकाले आयोजना गरेको कार्यक्रममा ओडलाई नगरप्रमुख दिलबहादुर ऐरले दोसल्ला ओढाएर सम्मान गर्नुभएको थियो ।
कार्यक्रममा नेपाल आइडल सिजन २ का विजेता ओडले कुनै पनि प्रतियोगिता जित्नका लागि कसैको साथ चाहिने भएकाले त्यो साथ यहाँका जनताले दिएको बताउनुभयो । यसैगरी आजै भीमदत्त नगरपालिकाका प्रमुख सुरेन्द्र बिष्टले समेत भीमदत्तनगरमा आयोजित कार्यक्रममा विजेता ओडलाई सम्मानपत्रसहित सम्मान गर्नुभएको छ । महेन्द्रनगर बजारमा आयोजित सम्मान कार्यक्रममा ठुलो सङ्ख्यामा समर्थकको उपस्थिती रहेको थियो ।
नेपाल आईडल सिजन दुईका विजेता रवि ओड मंगलबार कञ्चनपुरको शुक्लाफाँटा नगरपालिकाको झलारीमा पुगेर भोट दिने स्थानीय बासिन्दालाई धन्यवाद ज्ञापन गर्नुहुँदै । नेपाल आईडल सिजन दुई जितेर गृहनगर पुगेका ओडको भव्य रुपमा स्वागत गरिएको छ । तस्वीर : राजेन्द्रप्रसाद पनेरु, कञ्चनपुर, रासस
रासस
प्रतिक्रिया लेख्नुहोस्:-